სააღდგომოდ მატარებლების რეისების რაოდენობა იზრდება

თბილისი, 24 აპრილი — Sputnik. აღდგომის დღესასწაულთან დაკავშირებით „საქართველოს რკინიგზამ“ ბათუმისა და ფოთის მიმართულებით დამატებითი რეისები დაამატა, ნათქვამია კომპანიის მიერ გავრცელებულ ინფორმაციაში.

2, 3, 4 და 6 მაისის პერიოდში თბილისიდან ბათუმის მიმართულებით მატარებელი 10:25 საათზე გავა. ბათუმიდან კი დედაქალაქის მიმართულებით 17:20 საათზე გამოვა. ბათუმში კიდევ ერთი დამატებითი რეისი იმოძრავებს - მატარებელი 1-6 მაისის პერიოდში ბათუმის მიმართულებით 00:30 საათზე გავა, ბათუმიდან თბილისში კი 00:15 საათზე.

დამატებითი რეისი დაინიშნა ფოთის მიმართულებითაც, რომელიც თბილისიდან 08:40 საათზე გავა, ფოთიდან კი 16:10 საათზე გამოვა.

მატარებლის ბილეთების შეძენა შესაძლებელია „საქართველოს რკინიგზის" სალაროებში, სწრაფი გადახდის აპარატებით, რკინიგზის ვებ-გვერდზე და „საქართველოს რკინიგზის“ პარტნიორი კომპანიების მეშვეობით.

აღდგომის ბრწყინვალე დღესასწაული წელს 5 მაისს აღინიშნება.