თბილისს, ბათუმს, ქუთაისს, მესტიას, ამბროლაურსა და თელავს შორის ავიარეისები დაინიშნება

თბილისი, 4 აპრილი — Sputnik. საქართველოს აეროპორტების გაერთიანებამ, მთავრობის განკარგულების საფუძველზე, საქართველოს სამოქალაქო აეროპორტებში ავიარეისების ორგანიზებასთან დაკავშირებით ტენდერი გამოაცხადა, ნათქვამია კომპანიის მიერ გავრცელებულ ინფორმაციაში.

საქართველოს აეროპორტების გაერთიანების გენერალური დირექტორის, ირაკლი ქარქაშაძის განცხადებით, თბილისის, მესტიის, თელავის, ამბროლაურის, ბათუმისა და ქუთაისის მიმართულებით ერთმანეთს დაუკავშირდება საქართველოს აეროპორტების გაერთიანების მფლობელობაში არსებული ყველა საერთაშორისო თუ ადგილობრივი აეროპორტი.

ამჟამად ავიაკომპანია ახორციელებს შიდა ფრენებს სოფელ ნატახტარიდან მესტიის, ბათუმისა და ამბროლაურის მიმართულებით.

კომპანიის ცნობით, ელექტრონული ტენდერი ორ ნაწილად, ჯამში 12 მიმართულებაზე გამოცხადდა. უკვე არსებულს დაემატება ავიარეისები ახალი მიმართულებებითაც.

„მას შემდეგ, რაც რეაბილიტაცია ჩაუტარდება თელავის აეროპორტს, ისიც ჩართული იქნება შიდა ფრენების მიმართულებით და დავაკავშირებთ თელავის აეროპორტს ყველა დანარჩენ აეროპორტთან“, - განმარტა ქარქაშაძემ.

მისი თქმით, პროექტის მიზანია კიდევ უფრო გაიზარდოს ქვეყნის შიგნით მობილობა, რაც ხელს შეუწყობს ტურიზმის განვითარებას და კიდევ უფრო საინტერესო გახდება მოგზაურებისთვის საქართველოში სტუმრობა“, - აცხადებს ირაკლი ქარქაშაძე.

შესყიდვის საორიენტაციო ჯამური ღირებულება შეადგენს 5,6 მლნ აშშ დოლარის ეკვივალენტს ლარში. შესყიდვის ვადა ერთწლიანია. ხელშეკრულების მოქმედების პერიოდის განმავლობაში შესასყიდი ადგილების რაოდენობა რეისზე (იგულისხმება ორივე მიმართულება) ჯამში საორიენტაციოდ 47.760 ადგილი უნდა იყოს.

საჰაერო ხომალდზე ადგილების რაოდენობა მიმართულებების მიხედვით შემდეგნაირია:

სატენდერო წინადადებების მიღება 2 მაისს დაიწყება და 7 მაისს დამთავრდება.