კალაძე: გარე ძალები საქართველოში რევოლუციას ვერ მოაწყობენ

თბილისი, 23 მარტი – Sputnik. 2024 წლის საპარლამენტო არჩევნები ჩატარდება მშვიდ და დემოკრატიულ გარემოში, ვერც ერთი სახელმწიფო ვერ შეძლებს საქართველოს საშინაო საქმეებში ჩარევას და აქ რევოლუციის მოწყობას, განუცხადა ჟურნალისტებს მმართველი პარტია „ქართული ოცნება - დემოკრატიული საქართველოს“ გენერალურმა მდივანმა კახა კალაძემ.

მისი თქმით, მმართველ პარტიას საპარლამენტო არჩევნებზე საკონსტიტუციო უმრავლესობის მოპოვების დიდი შანსი აქვს, რასაც ჩატარებული კვლევები და საზოგადოებრივი მხარდაჭერა ადასტურებს.

„ამის თქმის საშუალებას გვაძლევს უზარმაზარი მხარდაჭერა საზოგადოების მხრიდან. დღეს, საქართველოში მცხოვრებლები კარგად ხედავენ და აანალიზებენ, ვინ ვინ არის, რომელი პოლიტიკური პარტია ვის ინტერესებს ემსახურება. მთელი ამ წლების განმავლობაში, კარგად გამოჩნდა ვის რა ინტერესი ჰქონდა ქვეყნის მიმართ. რადიკალიზმით ვერავინ ვერაფერს მიაღწევს და ისინი ყოველთვის მარცხისთვის იქნებიან განწირულნი“, - აღნიშნა მან.

მერმა აღნიშნა, რომ „ქართული ოცნება“ ერთადერთი პოლიტიკური ძალაა ქვეყანაში, რომელსაც რეალურად შეუძლია შეინარჩუნოს მშვიდობა, ეკონომიკური განვითარება და სხვისი მითითებით ისეთ გადაწყვეტილებებს არ მიიღებს, რომლებიც საქართველოს დააზარალებს.

საპარლამენტო არჩევნები საქართველოში 2024 წელს გაიმართება. დეპუტატებს პირველად ახალი სისტემით აირჩევენ: არჩევნები იქნება მთლიანად პროპორციული და საარჩევნო უბნებზე ელექტრონული კენჭისყრით ჩატარდება. პარტიებისთვის გამსვლელი ბარიერი იქნება 5%.

ბოლო გამოკითხვებით, ბარიერის გადალახვას ორიდან ხუთამდე პარტია შეძლებს. ლიდერობას ინარჩუნებს „ქართული ოცნება", „ნაცმოძრაობა" იკავებს მეორე პოზიციას და ყოველ გამოკითხვის დროს სხვაობა ამ პარტიებს შორის იზრდება „ოცნების" სასარგებლოდ.

ამ დროისთვის ოპოზიციურ პარტიებში შესაძლო კოალიციისა და თანამშრომლობის შესახებ მოლაპარაკებები აქტიურად მიმდინარეობს. გარდა ამისა, დააანონსეს ახალი პოლიტიკური ძალების გამოჩენაც, რომლებიც გამოკითხვებში ჯერ არ არიან ასახული.