მშვიდობა რეგიონში და სამომავლო პერსპექტივები - პრემიერის ბაქოში ვიზიტის მთავარი ასპექტები

თბილისი, 16 მარტი – Sputnik. საქართველოს პრემიერ-მინისტრმა ირაკლი კობახიძემ და აზერბაიჯანის პრეზიდენტმა ილჰამ ალიევმა ხაზი გაუსვეს ორი ქვეყნის სტრატეგიული პარტნიორობის მაღალ დონეს.

კობახიძის შეხვედრა ალიევთან პრემიერის რანგში პირველი ვიზიტის ფარგლებში გაიმართა. კობახიძე საქართველოს პრემიერ-მინისტრი მიმდინარე წლის 8 თებერვალს გახდა. მან ამ პოსტზე ირაკლი ღარიბაშვილი შეცვალა.

მთავრობის ადმინისტრაციის ცნობით, შეხვედრაზე საქართველოსა და აზერბაიჯანის ლიდერებმა ხაზი გაუსვეს მჭიდრო თანამშრომლობას სხვადასხვა მიმართულებით, მათ შორის სავაჭრო-ეკონომიკურ სფეროში.

მისი თქმით, საუბრისას მხარეები შეეხნენ ახალი პროექტების თემას, რომელთა განხორციელებაც ერთიანი ძალისხმევით უნდა მოხდეს.

„სატრანსპორტო სფეროში, ენერგეტიკულ სფეროში არის თანამშრომლობის განვითარების დიდი პერსპექტივა“, - აღნიშნა კობახიძემ.

განხილვის კიდევ ერთი თემა რეგიონში მშვიდობის და სტაბილურობის საკითხი იყო.

პრემიერმა შეხვედრაზე ილჰამ ალიევი საქართველოში მოიწვია.

„ეს ვიზიტიც იქნება ნაბიჯი, რომელიც ხელს შეუწყობს ჩვენი ურთიერთობების კიდევ უფრო მეტად განვითარებას. კიდევ ერთხელ აღვნიშნავ, რომ ჩვენ გვაქვს პარტნიორობისა და ურთიერთობების არაჩვეულებრივი დონე, თუმცა ყოველთვის არსებობს რა თქმა უნდა სივრცე, ურთიერთობების განვითარებისთვის და ჩვენ ყველაფერს გავაკეთებთ იმისათვის, რომ მაქსიმალურად გაღრმავდეს პარტნიორობა, მეგობრობა, თანამშრომლობა ორ ქვეყანას შორის“, - განაცხადა პრემიერმა.

თავის მხრივ, ალიევმა აღნიშნა საქართველოსა და აზერბაიჯანს შორის ურთიერთობების მნიშვნელობა. „საქართველოს პრემიერ-მინისტრის ვიზიტს აზერბაიჯანში დიდი მნიშვნელობა აქვს. ძალიან მნიშვნელოვანია მეზობელი, მეგობარი ქვეყნის მთავრობის მეთაურის ვიზიტი და ამ გაცნობის შემდეგ ჩვენი ურთიერთობები დიდ მეგობრობაში გადაიზრდება", - განაცხადა ალიევმა.

ვიზიტის წინ საქართველოს პრემიერ-მინისტრმა ირაკლი კობახიძემ ხაზი გაუსვა რეგიონში მშვიდობის უზრუნველყოფის მნიშვნელობას.

„მნიშვნელოვანია რეგიონში მშვიდობის უზრუნველყოფა და აქ, ჩვენი ქვეყანა ყოველთვის ასრულებდა დადებით როლს, შესაბამისად, ყველაფერი გაკეთდება იმისთვის, რომ ორმხრივი ურთიერთობები გაღრმავდეს და ხელი შევუწყოთ მშვიდობასა და სტაბილურობას“, - აღნიშნა ირაკლი კობახიძემ.

მსოფლიო არენაზე სამხრეთ კავკასიის როლის გაძლიერებაზე მუშაობა საქართველოს მთავრობის ერთ-ერთი ამოცანაა.

საქართველოს ხელისუფლებამ არაერთხელ განაცხადა, რომ მზად არის იმუშაოს სამხრეთ კავკასიაში გრძელვადიანი მშვიდობის მისაღწევად და სთავაზობდა თბილისს, როგორც პლატფორმას მოლაპარაკებებისთვის სომხეთსა და აზერბაიჯანს შორის ურთიერთობების დასარეგულირებლად.

2021 წლის დეკემბერში ირაკლი ღარიბაშვილი „მშვიდობიანი სამეზობლოს“ ინიციატივით გამოვიდა. მან მეზობელ ქვეყნებს შესთავაზა არაფორმალური დიალოგისთვის რეგიონული პლატფორმის შექმნა, რომელშიც მონაწილეობას მიიღებენ სომხეთი, აზერბაიჯანი და საქართველო. 2022 წლის ივლისში თბილისში სამი ქვეყნის საგარეო საქმეთა მინისტრების პირველი შეხვედრა გაიმართა.

უკვე 2023 წლის ოქტომბერში, ყარაბაღის მოვლენების შემდეგ, აზერბაიჯანის პრემიერ-მინისტრი ალი ასადოვი და სომხეთის პრემიერ-მინისტრი ნიკოლ ფაშინიანი ერთმანეთს პირისპირ პირველად საქართველოში შეხვდნენ.

საქართველომ და აზერბაიჯანმა დიპლომატიური ურთიერთობა 1992 წლის 18 ნოემბერს დაამყარეს. ქვეყნები აქტიურად თანამშრომლობენ ვაჭრობის, ტრანსპორტის, ენერგეტიკის, წარმოებისა და ლოგისტიკის სფეროებში.

საქართველო და აზერბაიჯანი არიან სტრატეგიული პარტნიორები და აქტიურად თანამშრომლობენ როგორც ორმხრივ ფორმატში, ასევე საერთაშორისო პროექტების ფარგლებში. კერძოდ, მთელი რეგიონისთვის სტრატეგიული მნიშვნელობის პროექტებში. ესენია ბაქო-თბილისი-ყარსის რკინიგზა, ბაქო-თბილისი-ჯეიჰანის ნავთობსადენი და გაზის სამხრეთის დერეფანი.