თბილისი, 3 მარტი — Sputnik. 2023 წელს საქართველოს პროფესიულ სასწავლებლებში ჩარიცხულ სტუდენტთა რაოდენობა, 2022 წელთან შედარებით, 9,9%-ით გაიზარდა, ნათქვამია სტატისტიკის ეროვნული სამსახურის „საქსტატის“ მასალებში.
უწყების ცნობით, 2023 წელს პროფესიულ-საგანმანათლებლო სასწავლო დაწესებულებებში ჩაირიცხა 15,5 ათასი სტუდენტი, მათგან 47,9% ქალი, 52,1% კი მამაკაცი.
2023 წლის ბოლოსთვის იმ საგანმანათლებლო სასწავლებლების რაოდენობა, რომლებიც სტუდენტებს პროფესიულ პროგრამებზე იღებდნენ, 96-ს შეადგენდა, აქედან 54 სახელმწიფო, ხოლო 42 – კერძო სასწავლებელი იყო.
პროფესიულ სასწავლებლებში ჩარიცხულ სტუდენტთა რაოდენობის მიხედვით ლიდერობს თბილისი (38,1%). შემდეგ მოდის აჭარა (17,2%), სამეგრელო–ზემო სვანეთი (9,7%), კახეთი (4,8%) და ქვემო ქართლი (7,8%).
2023 წელს პროფესიულ საგანმანათლებლო პროგრამებზე სპეციალური საგანმანათლებლო საჭიროების მქონე 264 სტუდენტი ჩაირიცხა, რომელთაგან 35,2% ქალია, ხოლო 64,8% მამაკაცი. რეგიონების მიხედვით ყველაზე მეტი სტუდენტი ჩაირიცხა თბილისსა (42,4%) და ქვემო ქართლში (10,2%).
გასულ წელს კურსდამთავრებულთა რაოდენობამ 8,1 ათასი შეადგინა, მათგან 48,3% ქალი და 51,7% მამაკაცია. სტუდენტები სულ უფრო ხშირად ირჩევენ ისეთ საგანმანათლებლო პროგრამებს, როგორიცაა ინჟინერია, ჯანდაცვა, ბიზნეს-ადმინისტრირება, წარმოება და მშენებლობა, სამართალი და ჯანდაცვა.
მას შემდეგ, რაც საქართველომ „პროფესიული განათლების შესახებ“ ახალი კანონი მიიღო, ქვეყანაში მნიშვნელოვნად განვითარდა პროფესიული განათლების სხვადასხვა მიმართულებები.