თბილისი, 28 თებერვალი – Sputnik. Air Georgia-ს დამფუძნებელი გიორგი კოდუა ცრუობს როდესაც აცხადებს, რომ მთავრობა ხელს უშლის მას აშშ-ში პირდაპირი ფრენების დაწყებაში, რადგან მის ავიაკომპანიას არც ერთი თვითმფრინავი არ ჰყავს, განაცხადა პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა.
„ბატონი კოდუა მორიგ ჯერზე ცრუ ინფორმაციას ავრცელებს, მის კომპანიას დღეს არცერთი ავიახომალდი არ გააჩნია, რომლის საფუძველზეც მას ექნებოდა შესაბამისი უფლებები და ლიცენზიები, რომ აშშ-ის ან ნებისმიერი სხვა მიმართულებით განახორციელოს ფრენა“, - განაცხადა დავითაშვილმა.
Air Georgia-ს ჰყავდა ერთადერთი თვითმფრინავი, რომლის ამოღებაც თავად კომპანიამ ითხოვა სამოქალაქო თვითმფრინავების სახელმწიფო რეესტრიდან. შედეგად, კანონის თანახმად, კომპანიამ დაკარგა ოპერირების უფლება.
„ეს კანონმდებლობით ავტომატურად წყდება. ასე რომ, ყველაფერი არის აბსოლუტური სპეკულაცია, რომ ჩვენ რაიმენაირად შევუშალეთ ხელი და არ ვართ დაინტერესებული“, - განაცხადა დავითაშვილმა.
მან აღნიშნა, რომ ამერიკელ პარტნიორებთან ხშირად განიხილება საკითხი, თუ როგორ შეიძლება კიდევ წახალისდეს საქართველოსა და ამერიკას შორის ეკონომიკური ურთიერთობები, მათ შორის ტრანსპორტის სფეროში თანამშრომლობა და პირდაპირი ფრენებიც.
დავითაშვილის თქმით, კოდუა სხვადასხვა დროს სხვადასხვა ავიაკომპანიებში მუშაობდა და თავისი ვალდებულებების შეუსრულებლობის გამო დაკარგა ოპერირების უფლება, ბოლო შემთხვევაშიც ასე იყო.
Air Georgia 2019 წელს დაფუძნდა.