თბილისი, 25 თებერვალი – Sputnik. ანალიტიკოსი და საზოგადოებრივი მოძრაობა „ხალხის ძალის“ წევრი დავით ქართველიშვილი „თიბისი ბანკის“ დამფუძნებლისა და პარტია „ლელო საქართველოსთვის“ ლიდერის მამუკა ხაზარაძისგან წინასაარჩევნო პერიოდში ახალ პერფორმანსებს ელოდება.
ხაზარაძე 2024 წლის 26 ოქტომბრის საპარლამენტო არჩევნებისთვის საქართველოს რეგიონებშია აქტიურ წინასაარჩევნო კამპანიას აწარმოებს.
„რომელიმე რეგიონში „ლელოს“ ახალი წინასაარჩევნო პერფორმანსის მოლოდინში ვართ. აი მაგალითად ასეთის: ხაზარაძე ნიჩბით ორმოებს თხრის, მის უკან უსუფაშვილი კი ამ ორმოებს ისევ მიწით ავსებს, და ასე გრძელდება ერთი ასი მეტრის მანძილზე - ხაზარაძე თხრის, უსუფაშვილი ავსებ“, - განაცხადა ქართველიშვილმა.
ქართველიშვილის თქმით, „ლელოს“ საქმიანობას ყოველთვის რაღაც აკლია, ამიტომ შედეგიც უცნაურია ხოლმე.
„ბოლოს ვიღაც გაკვირვებულმა იკითხა - რასაჲ შვრებითო. ხაზარაძემაც აუხსნა: ჩვენო სამნი უნდა ვყოფილიყავითო - ჩემს მერე, მეორეს ნერგები უნდა დაერგო, უსუფას კი მიწა მიეყარა, მაგრამ გეგელია ავად გახდა და ვეღარ წამოვიდაო...“ - აღნიშნა ქართველიშვილმა.
საპარლამენტო არჩევნების წინ, ოპოზიციურმა პარტია „ლელო საქართველოსთვის“, რომელიც რუსეთის წინააღმდეგ სანქციების დაწესების მომხრეა, ხელისუფლებაში მოსვლის შემთხვევაში პენსიების 1 ათას ლარამდე გაზრდის პირობა დადო. მმართველ პარტიაში აცხადებენ, რომ რუსეთის წინააღმდეგ სანქციების შემოღება თავად საქართველოს დააზარალებს და ასეთ პირობებში პენსიების გაზრდაზე საუბარი არ შეიძლება იყოს.
გარდა ამისა, ხაზარაძე თავის წინასაარჩევნო კამპანიაში ფსონს მმართველი პარტია „ქართული ოცნება - დემოკრატიული საქართველოს“ დამფუძნებლის, ბიძინა ივანიშვილის კრიტიკაზე აკეთებს. მან „ქართული ოცნების“ საპატიო თავმჯდომარე რუსეთის მსახურებაში დაადანაშაულა და განაცხადა, რომ „მისი ადგილი კრემლშია“.