თბილისი, 16 თებერვალი – Sputnik. პარლამენტის საპროცედურო საკითხთა და წესების კომიტეტმა ირაკლი კობახიძისა და ირაკლი ჩიქოვანისთვის პარლამენტის წევრის უფლებამოსილების ვადამდე შეწყვეტის საკითხი განიხილა, ნათქვამია პარლამენტის პრეს-სამსახურის მიერ გავრცელებულ ინფორმაციაში.
აღნიშნული საკითხი დღის წესრიგში მას შემდეგ დადგა, რაც ირაკლი კობახიძემ და ირაკლი ჩიქოვანმა საკანონმდებლო ორგანოდან აღმასრულებელ ხელისუფლებაში გადაინაცვლეს - საპარლამენტო უმრავლესობის ლიდერი ირაკლი კობახიძემ პრემიერ-მინისტრი, ვიცე-სპიკერი ირაკლი ჩიქოვანი კი თავდაცვის მინისტრი გახდა.
კომიტეტის წევრებმა ირაკლი კობახიძისა და ირაკლი ჩიქოვანისთვის პარლამენტის წევრის უფლებამოსილების ვადამდე შეწყვეტას მხარი დაუჭირეს და ყოფილ კოლეგებს საქმიანობაში წარმატებები უსურვეს.
მმართველი პარტია „ქართული ოცნება - დემოკრატიული საქართველოს“ საარჩევნო სიის მიხედვით, პარლამენტში გამოთავისუფლებულ ადგილს გიორგი ბარვენიშვილი დაიკავებს - გიორგი ბარვენიშვილი მმართველი პარტიის პროპორციულ საარჩევნო სიაში 71-ეა.
რაც შეეხება ვიცე-სპიკერ ირაკლი ჩიქოვანის საპარლამენტო მანდატს, როგორც ფრაქცია „ქართული ოცნების“ თავმჯდომარემ მამუკა მდინარაძემ განმარტა, ჩიქოვანი მაჟორიტარული სიით არის არჩეული, ხოლო შუალედური არჩევნები საარჩევნო წელს არ ტარდება. შესაბამისად წელს ზუგდიდი მაჟორიტარი დეპუტატის გარეშე დარჩება.
ირაკლი ღარიბაშვილმა ორშაბათს, 29 იანვარს მთავრობის მეთაურის თანამდებობიდან გადადგომის შესახება განაცხადა. ირაკლი კობახიძის კანდიდატურა პრემიერის თანამდებობაზე, მმართველი პარტია „ქართული ოცნება - დემოკრატიული საქართველოს“ წესდების მიხედვით, პოლიტსაბჭოს სხდომაზე 1-ელ თებერვალს ოფიციალურად წარადგინა პარტიის საპატიო თავმჯდომარე ბიძინა ივანიშვილმა, ხოლო შემდეგ ამას მხარი დაუჭირა ყრილობამ.
საქართველოს პარლამენტმა 8 თებერვალს ირაკლი კობახიძეს, მის მიერ წარდგენილ მთავრობას და სამთავრობო პროგრამას „ევროპული სახელმწიფოს მშენებლობისთვის“ ნდობა გამოუცხადა. იმავე დღეს საქართველოს პრეზიდენტმა სალომე ზურაბიშვილმა ხელი მოაწერა პრემიერ-მინისტრის თანამდებობაზე ირაკლი კობახიძის დანიშვნის შესახებ განკარგულებას და მან მთავრობის მეთაურის თანამდებობა ოფიციალურად დაიკავა.