თბილისი, 17 იანვარი — Sputnik. პაკისტანი მკაცრად გმობს ირანის მიერ მისი საჰაერო სივრცის არაპროვოცირებულ დარღვევას და პაკისტანის ტერიტორიაზე თავდასხმას, რომლის შედეგადაც ორი უდანაშაულო ბავშვი დაიღუპა და დაიჭრა სამი გოგონა, ნათქვამია პაკისტანის საგარეო საქმეთა სამინისტროს განცხადებაში.
როგორც უწყებაში აღნიშნავენ, პაკისტანის სუვერენიტეტის დარღვევა სრულიად მიუღებელია და შეიძლება სერიოზული შედეგები მოჰყვეს. მით უმეტეს, რომ „ეს უკანონო აქტი პაკისტანსა და ირანს შორის მრავალი საკომუნიკაციო არხის არსებობის მიუხედავად მოხდა“.
„პაკისტანის მტკიცე პროტესტი უკვე გადაეცა ირანის საგარეო საქმეთა სამინისტროს შესაბამის მაღალჩინოსანს თეირანში. გარდა ამისა, ირანის საქმეთა დროებითი რწმუნებული გამოძახებულია [პაკისტანის] საგარეო საქმეთა სამინისტროში, რათა გადავცეთ მას პაკისტანის სუვერენიტეტის ამ უხეში დარღვევის გამო ჩვენი მკაცრი საყვედური და ასევე ვაცნობოთ, რომ შედეგებზე პასუხისმგებლობა მხოლოდ ირანს ეკისრება“, — წერია დოკუმენტში.
ამასთან უწყებაში ხაზს უსვამენ, რომ პაკისტანს ტერორიზმი ყოველთვის საერთო საფრთხედ მიაჩნდა რეგიონის ყველა ქვეყნისთვის და ამიტომ კოორდინირებულ მოქმედებას მოითხოვს.
„ასეთი ცალმხრივი ქმედებები არ შეესაბამება კეთილმეზობლურ ურთიერთობებს და შეიძლება სერიოზულად შეარყიოს ორმხრივი ნდობა“, — ნათქვამია სამინისტროს განცხადებაში.
მანამდე, სამშაბათს, ირანის ისლამური რევოლუციის გუშაგთა კორპუსმა ბალისტიკური რაკეტებითა და დრონებით მიიტანა იერიში ტერორისტული დაჯგუფება „ჯეიშ ალ-ადლის“ ძირითად ბაზაზე, რომელიც ირანთან მოსაზღვრე პაკისტანის პროვინცია ბელუჯისტანშია განთავსებული. ეს ირანის შეიარაღებული ძალების პირველი სარაკეტო დარტყმაა პაკისტანის ტერიტორიაზე.
უფრო ადრე, გასული წლის დეკემბრის შუა რიცხვებში, ირანის სასაზღვრო პროვინციებში ტერორისტული აქტი მოხდა, რის შედეგადაც 12 პოლიციელი დაიღუპა, შვიდი კი დაშავდა. ტერაქტზე პასუხისმგებლობა ირანში ტერორისტულად აღიარებულმა სუნიტურმა დაჯგუფება „ჯაიშ ალ-ადლმა“ (სამართლიანობის არმია) აიღო.