თბილისი, 29 დეკემბერი – Sputnik. ინტერაქტიულმა სტრეს–ტესტებმა აჩვენა, რომ ბანკები საქართველოში გაუმკლავდებიან მაკროფინანსურ შოკებს და შეინარჩუნებენ სტაბილურობას, ნათქვამია საქართველოს ეროვნული ბანკის განცხადებაში.
ინტერაქტიული სტრეს-ტესტი ყოველწლიურად განახლებადი ინსტრუმენტია, რომელიც კომერციული ბანკების ფინანსური გამჭვირვალობის გაზრდას უწყობს ხელს. ინტერაქტიული პლატფორმის მეშვეობით, დაინტერესებულ საზოგადოებას თავად შეუძლია თითოეული მაკროეკონომიკური ცვლადისთვის ჰიპოთეტური სტრესული სცენარის არჩევა და კომერციული ბანკის კაპიტალის კოეფიციენტის დინამიკაზე დაკვირვება.
„სტრეს-ტესტის შედეგების მიხედვით, ზომიერი და მკაცრი სტრეს–სცენარის შემთხვევაში, საკრედიტო დანაკარგების მიუხედავად, ყველა ბანკი მდგრადობას ინარჩუნებს. მიმდინარე მდგომარეობით, საბანკო სექტორი, წინა წელთან შედარებით, მეტად კაპიტალიზებულია, შედეგად გაზრდილია საბანკო სექტორის მდგრადობა შოკების მიმართ და გაუმჯობესებულია“, – ნათქვამია განცხადებაში.
ეროვნული ბანკის მონაცემებით, ექსტრემალური სცენარის შემთხვევაში, დამატებითი კაპიტალი მხოლოდ ერთ ბანკს ესაჭიროება, რამდენიმე ბანკისთვის კი პირველადი კაპიტალი მინიმალური მოთხოვნის დონეზე ნარჩუნდება.
„საბანკო სექტორი ექსტრემალური სცენარის პირობებშიც აკმაყოფილებს კაპიტალის მინიმალურ მოთხოვნას. ინტერაქტიული სტრეს–ტესტის დეტალური შედეგები მაკროეკონომიკური სცენარების სხვადასხვა კომბინაციისთვის შეგიძლიათ იხილოთ ეროვნული ბანკის ვებ-გვერდზე“, – ნათქვამია განცხადებაში.
ეროვნული ბანკი აღნიშნავს, რომ სტრეს–სცენარები და სტრეს-ტესტის დაშვებები არ არის და არ შეიძლება ჩაითვალოს ეროვნული ბანკის პროგნოზებად.
„ეს დაშვებები მხოლოდ თეორიული სიმულაციაა, რომელიც, მათი რეალიზაციის შემთხვევაში, ფინანსური სექტორის მდგრადობის შესაფასებლად გამოიყენება. სტრეს-ტესტის განმარტებიდან და მიზნიდან გამომდინარე, სცენარები, რომლებსაც სტრეს ტესტი ეფუძნება უნდა იყოს საკმარისად მძიმე, ნაკლებ სავარაუდო, თუმცა დასაშვები“, – აღნიშნულია განცხადებაში.
ეროვნული ბანკის ინფორმაციით, ინტერაქტიული სტრეს–ტესტის მოდელირებისას გამოყენებული იყო 2023 წლის მეორე კვარტლის მონაცემები.