თბილისი, 8 დეკემბერი — Sputnik. თბილისის საერთაშორისო აეროპორტში, ნისლისა და ცუდი ხილვადობის გამო, რამდენიმე თვითმფრინავი ვერ დაჯდა, ისინი სათადარიგო აეროპორტებში გაფრინდნენ. ინფორმაციას თბილისის საერთაშორისო აეროპორტი ავრცელებს.
არსებული ცნობით, უამინდობის გამო ვერ შესრულდა „კატარის ავიახაზების“ რეისი დოჰა-თბილისი - თვითმფრინავი ერევანში დაჯდა, „ჯაზირას“ ავიახაზების კუთვნილი თვითმფრინავი, რომელიც ქუვეითი-თბილისის რეისს ასრულებდა, ასევე ერევანში გაფრინდა, ხოლო ავიაკომპანია „აზიმუტის“ თვითმფრინავი, რეისით მოსკოვი-თბილისი, ქუთაისში დაჯდა.
თბილისში დღევანდელი რეისები გააუქმეს „პეგასუსმა“ და „თურქეთის ავიხაზებმა“, ორივე მათგანი სტამბოლიდან თბილისში უნდა გამოფრენილიყო.
„ამ ეტაპზე 02:00 საათამდე ნავარაუდევია ხილვადობა 350 მეტრი, რაც არის ძალიან დაბალი მაჩვენებელი. ამის გამო ავიაკომპანიები იღებენ გადაწყვეტილებას, დაჯდომა განახორციელონ სათადარიგო აეროპორტებში“, – აცხადებენ თბილისის აეროპორტში.
სინოპტიკოსების პროგნოზით, საქართველოს მთელ ტერიტორიაზე 9 დეკემბერამდე ძლიერი თოვა, ზვავსაშიშროება და ნისლია მოსალოდნელი.