თბილისი, 8 დეკემბერი — Sputnik. ნოემბერში ქუთაისის დავით აღმაშენებლის სახელობის საერთაშორისო აეროპორტში მგზავრთნაკადი, წინა წლის ანალოგიურ პერიოდთან შედარებით, 86%-ით გაიზარდა, იუწყება საქართველოს აეროპორტების გაერთიანება.
კომპანიის ინფორმაციით, ნოემბრის თვეში დავით აღმაშენებლის სახელობის აეროპორტით 133.732 მგზავრმა ისარგებლა. 2022 წლის ნოემბერში ეს მაჩვენებელი 71.746 მგზავრი იყო.
მგზავრთნაკადის გარდა, ნოემბრის თვეში მნიშვნელოვანი ზრდაა ქუთაისის საერთაშორისო აეროპორტიდან განხორციელებული ავიარეისების კუთხითაც - დაფიქსირდა 56%-იანი ზრდა. დავით აღმაშენებლის სახელობის აეროპორტი ნოემბერში 417 რეისს მოემსახურა (2022 წლის ნოემბერში შესრულდა 268 რეისი).
2023 წლის 16 დეკემბრიდან ქუთაისის საერთაშორისო აეროპორტს Wizz AIr-ის მეოთხე ბაზირებული ხომალდი და კოპენჰაგენის მიმართულება დაემატება, ხოლო 19 დეკემბრიდან აეროპორტში ოპერირებას დაიწყებს ავიაკომპანია Pegasus Airlines და სტამბული-ქუთაისი-სტამბულის მიმართულებით ფრენებს კვირაში 3 სიხშირით შეასრულებს.
საქართველოს აეროპორტების გაერთიანების ინფორმაციით, ამ ეტაპისთვის ქუთაისის საერთაშორისო აეროპორტიდან 5 ავიაკომპანია ოპერირებს. რეისები 18 ქვეყნის 35 მიმართულებით სრულდება.