თბილისი, 5 დეკემბერი — Sputnik. ამერიკული Voice-ის პირველ ლაივ-კონცერტზე ქართველი მონაწილის, ნინი ბრეგვაძის ბრწყინვალე გამოსვლამ როგორც ჟიურის, ისე მსმენელთა მხრიდან დიდი ოვაციები დაიმსახურა.
ნინიმ პროექტის პირველ პირდაპირ ეთერში მუსიკოსების თანხლებით ჯგუფ The Cure-ის სიმღერა Lovesong შეასრულა.
მიუხედავად იმისა, რომ ნინის შესრულება YouTube-ზე რამდენიმე საათის წინ გამოჩნდა, ვიდეო 40 ათასზე მეტი ნახვა და ბევრი დადებითი კომენტარი დაიმსახურა.
„ერთ-ერთი საუკეთესო გამოსვლა, რაც კი ოდესმე მინახავს ამ პროექტის ისტორიაში", არაჩვეულებრივი ვოკალის გარდა, შესრულების მისი სტილიც გასაოცარია", „ვიტირე! ფინალში მინდა მისი ნახვა!“ - წერენ მომხმარებლები
ეს გამოსვლა თავად ბრეგაძისთვისაც განსაკუთრებული გახდა, რასაც იგი სოციალურ ქსელში გამოეხმაურა.
„სიტყვებს ვერ ვპოულობ. ეს სიმღერა ჩემთვის ძალიან ბევრს ნიშნავს და ჩემი მიზანი იმ ემოციების თქვენამდე მოტანა იყო, რასაც ეს სიმღერა იწვევს ჩემში! მე თქვენ მიყვარხართ", - დაწერა მომღერალმა.
ახლა ჯერი ამერიკაში მცხოვრებ მაყურებელზეა. მათ აქტიურად უნდა მისცენ ხმა ქართველ მომღერალს, რათა მან შოუში მონაწილეობის გაგრძელება შეძლოს. თუმცა, ხმის მიცემა მხოლოდ ორგანიზატორების მიერ გამოყოფილ დროს არის შესაძლებელი.
ნინის მხარდაჭერის მსურველებს ხმის მიცემა შეუძლიათ ტელეკომპანია NBC-ის ვებგვერდზე https://voice.vote.nbc.com, ასევე Voice აპლიკაციის გამოყენებით, რომლის ჩამოტვირთვა შესაძლებელია როგორც Android-ზე, ისე iOS-ზე.
სამშაბათს, 5 დეკემბერს, პირდაპირ ეთერში, რვა მონაწილე დასახელდება, რომლებიც პროექტის ნახევარფინალში გადავლენ. ასევე დასახელდება ოთხი აუტსაიდერი, რომლებიც შოუში დარჩენისთვის იბრძოლებენ. ამის შემდეგ დაიწყება ხუთწუთიანი კენჭისყრა, რის შემდეგაც გადაწყდება, ვინ დატოვებს და ვინ დარჩება პროექტში.