თბილისი, 27 ნოემბერი — Sputnik. საქართველოს თავდაცვის მინისტრი ჯუანშერ ბურჭულაძე აზერბაიჯანის დედაქალაქში ჩავიდა, იუწყება „Sputnik-აზერბაიჯანი".
საქართველოს თავდაცვის მინისტრი მონაწილეობას მიიღებს აზერბაიჯანის, საქართველოსა და თურქეთის რიგით მეათე სამმხრივ შეხვედრაში, რომელიც დღეს ბაქოში გაიმართება.
„ღონისძიების ფარგლებში, ორმხრივ და სამმხრივ ფორმატში შეხვედრებზე დაგეგმილია ერთობლივი სამხედრო თანამშრომლობის განვითარების პერსპექტივებისა და რეგიონული უსაფრთხოების რიგი საკითხების განხილვა“, - ნათქვამია განცხადებაში.
გავრცელებული ინფორმაციით, საქართველოს თავდაცვის მინისტრ ჯუანშერ ბურჭულაძის, აზერბაიჯანის თავდაცვის მინისტრ, გენერალ-პოლკოვნიკ ზაქირ ჰასანოვისა და თურქეთის თავდაცვის მინისტრ იაშარ გიულერის შეხვედრა უახლოეს საათებში დაიწყება.
საქართველო, თურქეთი და აზერბაიჯანი სტრატეგიული მოკავშირეები არიან. თანამშრომლობა თავდაცვის სფეროში ქვეყნებს შორის 2012 წელს დაიწყო.
ტრადიციული სამმხრივი მინისტერიალი ბოლოს მიმდინარე წლის თებერვალში თურქეთში გაიმართა, რომლის ფარგლებშიც მხარეებმა ერთობლივი სამხედრო წვრთნების მნიშვნელობაზე გაამახვილეს ყურადღება. მინისტრებმა კიდევ ერთხელ აღნიშნეს სამმხრივ ფორმატში თანამშრომლობის მნიშვნელობა, რომელიც ემსახურება რეგიონში უსაფრთხოებასა და სტაბილურობას.