თბილისში ბინებზე ფასები იზრდება - ახალი სტატისტიკა

თბილისი, 20 ნოემბერი — Sputnik. თბილისში ახალ საცხოვრებელ ბინებზე ფასების წლიური ინდექსი 2023 წლის მესამე კვარტალში 15,6%-ით გაიზარდა, ხოლო 2023 წლის მეორე კვარტალთან შედარებით ფასები 5,5%-ით გაიზარდა, იუწყება სტატისტიკის ეროვნული სამსახური „საქსტატი".

2020 წლის საშუალოწლიურ მაჩვენებელთან შედარებით, თბილისში ახალ საცხოვრებელ ბინებზე ფასების წლიური ინდექსი მესამე კვარტალში 39,5%-ით გაიზარდა.

„საქსტატის" მონაცემებით, ახალაშენებული ბინების ფასების ზრდამ მიმდინარე წლის მესამე კვარტალში, 2023 წლის მეორე კვარტალთან შედარებით 5,2% შეადგინა, ხოლო 2022 წლის მესამე კვარტალთან შედარებით ის 15,7%-ით გაიზარდა.

თბილისში ახალაშენებულ კერძო სახლებზე ფასები მესამე კვარტალში, 2023 წლის მეორე კვარტალთან შედარებით, 6,2%-ით გაიზარდა, ხოლო 2022 წლის მესამე კვარტალთან შედარებით – 13,4%-ით.

„საქსტატის" კვლევის თანახმად, 2023 წლის მესამე კვარტალში ერთი კვადრატული მეტრის საშუალო ფასი ახლად აშენებულ კორპუსებში შეადგენს: ე.წ. შავი კარკასი – 2.809 ლარს, თეთრი კარკასი – 3.159 ლარს, მწვანე კარკასი – 3.548ლარს. 2022 წლის მესამე კვარტალში ფასები ასეთი იყო: შავი კარკასი – 2.326 ლარი, თეთრი – 2.585, მწვანე – 3.115 ლარი.

ფასების ინდექსი მაკროეკონომიკური და ფინანსური სტაბილურობის მნიშვნელოვანი ინდიკატორია და მას უმეტესად საქართველოს ეროვნული ბანკი და კერძო დეველოპერები იყენებენ.

ის, ერთი მხრივ, ემსახურება უძრავი ქონების განვითარებისა და ბაზრის რისკების შეფასებას, ხოლო მეორე მხრივ – უძრავი ქონების ბაზარსა და ფინანსურ სტაბილურობასთან კავშირების დადგენასა და შეფასებას.