თბილისი, 17 ნოემბერი – Sputnik. იუსტიციის სახლში სამართლის ისტორიის ჰოლოგრამული მუზეუმის გახსნა იგეგმება, განაცხადა იუსტიციის მინისტრმა რატი ბრეგაძემ პარლამენტში.
პარასკევს ბრეგაძე საკანონმდებლო ორგანოში „მინისტრთა საათის“ ფორმატში გამოდის და დეპუტატებს გაწეული სამუშაოს შედეგებს აცნობს.
„სულ ცოტა ხანში ჩვენ გავხსნით იუსტიციის სახლში სამართლის ისტორიის ჰოლოგრამულ მუზეუმს, რაც, თავის მხრივ, არის უნიკალური და ნებისმიერ მნახველს მისცემს შესაძლებლობას, მიიღოს სრულფასოვანი ინფორმაცია სამართლის ნებისმიერ ძეგლზე, რაც ჩვენ გვაქვს საქართველოში“, - აღნიშნა მინსტრმა.
მისი თქმით, მუზეუმში მსოფლიოს სამართლებრივ ისტორიის გაცნობაც იქნება შესაძლებელი
„ეს იქნება უნიკალური მუზეუმი, რომელსაც მსოფლიოში ნამდვილად არ აქვს ანალოგი სამართლის კუთხით“, – განაცხადა რატი ბრეგაძემ.
გარდა ამისა, სამართლებრივ საკითხებში მოსახლეობის ინფორმირებულობის გაზრდის მიზნით, უწყება საკუთარი ტელესტუდია „იუსტიციის“ გახსნას გეგმავს, რომელიც 2024 წლიდან დაიწყებს ფუნქციონირებას.
ბრეგაძის თქმით, პროექტი ასევე შეუწყობს ხელს ადვოკატის პროფესიის პოპულარიზაციას და საზოგადოების სამართლებრივი ცნობიერების ამაღლებას.