თბილისი, 10 ნოემბერი — Sputnik. არ მეგულება ევროპაში არცერთი ქვეყანა, რომელიც საქართველოს შემდეგ ეტაპზე გადასვლას მხარს არ დაუჭერს, განაცხადა პრემიერ-მინისტრმა ირაკლი ღარიბაშვილმა.
მისი თქმით, არც საგარეო საქმეთა მინისტრს, რომელმაც „თითქმის ყველა ქვეყანა მოიარა“, და არც პირადად მას, ეჭვი არ ეპარებათ, რომ საქართველოსთვის სტატუსის მინიჭებას ყველა სახელმწიფო დათანხმდება.
„მქონდა კომუნიკაცია თითქმის ყველა ევროპელ ლიდერთან. მე დღეს არ მეგულება ევროპაში არცერთი ქვეყანა, რომელიც მხარს არ დაუჭერს ჩვენი ქვეყნის შემდეგ ეტაპზე გადასვლას — ანუ სტატუსის მინიჭებას უკვე ოფიციალურად. მით უმეტეს მას შემდეგ, რაც ევროკომისიამ რეკომენდაცია გასცა და თქვა, რომ ისინი მიღწეულ შედეგზე დაყრდნობით აძლევენ ქვეყანას რეკომენდაციას, რომ სტატუსიმიეცეს მას“, — აღნიშნა ღარიბაშვილმა.
პრემიერის თქმით, მას პოზიტიური მოლოდინები აქვს და იმედოვნებს, რომ არაფერი შეიცვლება.
„ჩვენ უნდა გავნაგრძოთ მუშაობა. გვექნება მჭიდრო კოორდინაცია ჩვენს ევროპელ მეგობრებთან, კოლეგებთან და ვფიქრობ, რომ ყველაფერი იქნება ძალიან კარგად“, — ხაზი გაუსვა მან.
ევროკომისიამ 8 ნოემბერს ევროპულ საბჭოს საქართველოსთვის კანდიდატის სტატუსის მინიჭების რეკომენდაციით მიმართა. 14-15 დეკემბერს ევროპული საბჭო ევროკომისიის დასკვნის საფუძველზე მიიღებს შემაჯამებელ გადაწყვეტილებას გაფართოების პოლიტიკისა და საქართველოსთვის კანდიდატის სტატუსის მინიჭების თაობაზე.