ძლიერმა ქარმა დედაქალაქში პრობლემები შექმნა: მოგლეჯილია ხეები და დაზიანებულია მანქანები

თბილისი, 9 ოქტომბერი – Sputnik. ძლიერმა ქარმა დედაქალაქში პრობლემები შექმნა, იუწყება ტელეკომპანია „რუსთავი2“.

ძლიერი ქარის შედეგად საბურთალოს რაიონში, მარიჯანის ქუჩაზე დაუმთავრებელი მშენებარე კორპუსიდან კედელი მოწყდა და ნანგრევები იქვე გაჩერებულ მანქანებს დაეცა. დაზიანებულია სულ მცირე 8 მანქანა. ფოტოები სოციალურ ქსელებში ვრცელდება.

მინდელის ქუჩაზე ქარმა ხე მოგლიჯა, რომელიც იქვე მდგომ მანქანას დაეცა. ადგილზე საპატრულო პოლიცია და მაშველები არიან მობილიზებული.

ქარმა ასევე პრობლემები შექმნა ვაჟა-ფშაველას, პოლიტკოვსკაიას და ზაქარიაძის ქუჩებზეც.

ქინძმარაულის ქუჩაზე ძლიერი ქარის გამო განათების ბოძი წაიქცა და გაზის მილს დაეცა.

მოგლეჯილია რამდენიმე ხე და დაზიანებულია მანქანები. შემთხვევის შედეგად არავინ დაშავებულა. მეხანძრე-მაშველებმა აღნიშნული ტერიტორიები უკვე გაასუფთავეს.

სინოპტიკოსების პროგნოზით, 9 ოქტომბრიდან 10 ოქტომბრის დღის მეორე ნახევრამდე საქართველოს მთელ ტერიტორიაზე მოსალოდნელია დასავლეთის მიმართულების ძლიერი, დროგამოშვებით ძალიან ძლიერი ქარი.