თბილისი, 7 ოქტომბერი – Sputnik. ქართველი ხალხი მხარს უჭერს ისრაელს, რომლის წინააღმდეგაც განხორციელდა სასტიკი და არაადამიანური აგრესია, წერს საქართველოს პარლამენტის თავმჯდომარე შალვა პაპუაშვილი სოციალურ ქსელში.
შაბათს პალესტინის მოძრაობა ჰამასის სამხედრო ფრთამ ისრაელის წინააღმდეგ დაიწყო ოპერაცია „ალ-აქსას წარღვნა“ და განაცხადა, რომ მან ღაზის სექტორიდან 5000 რაკეტა გაისროლა. შედეგად 40-ზე მეტი ისრაელის მოქალაქე დაიღუპა და 740-ზე მეტი დაშავდა. საპასუხოდ, ისრაელის თავდაცვის ძალებმა (IDF) ღაზის სექტორში კონტრტერორისტული ოპერაცია „რკინის ხმლები“ წამოიწყეს.
„გაუმართლებელი, სასტიკი და არაადამიანური აგრესია ისრაელის სახელმწიფოს წინააღმდეგ მიუღებელია. ქართველი ხალხი მხარს უჭერს მოძმე ისრაელს. ასეთი ძალადობის ადგილი მსოფლიოში არ უნდა იყოს“, - დაწერა პაპუაშვილმა twitter-ში.
საქართველოს საგარეო საქმეთა სამინისტროს ინფორმაციით, ისრაელის ტერიტორიაზე მასირებული შეტევის შედეგად დაშავებულთა შორის საქართველოს მოქალაქეები არ არიან.
ისრაელში საგანგებო მდგომარეობა გამოცხადდა. თავდაცვის სამინისტრომ რეზერვისტების გაწვევა დაიწყო, არმია სრულ საბრძოლო მზადყოფნაშია მოყვანილი.