თბილისი, 27 სექტემბერი — Sputnik. ლატვიაში ქართული ღვინის დეგუსტაცია გაიმართა, ნათქვამია ღვინის ეროვნული სააგენტოს მიერ გავრცელებულ ინფორმაციაში.
ქართული ღვინის წარდგენა რიგაში ღვინის ეროვნული სააგენტოს მხარდაჭერით და ბალტიისპირეთის ქვეყნებში სააგენტოს კონტრაქტორი მარკეტინგული კომპანიის TRIBE INTERNATIONAL ორგანიზებით მოხდა.
ღონისძიებას ღვინის იმპორტიორები, დისტრიბუტორები, ღვინის მწერლები, ჟურნალისტები, ბლოგერები და სომელიეები დაესწრნენ. საპრეზენტაციოდ წარდგენილი იყო 10-მდე დასახელების ქართული ღვინო.
ბალტიისპირეთის ქვეყნები ქართული ღვინის პრიორიტეტული საექსპორტო ბაზარია, სადაც სსიპ ღვინის ეროვნული სააგენტო, ქართული ღვინის პოპულარიზაციისა და ექსპორტის ზრდის ხელშესაწყობის მიზნით აქტიურად ახორციელებს სარეკლამო-მარკეტინგული ღონისძიებებს.
რიგაში ღონისძიებას საქართველოს საგანგებო და სრულუფლებიანი ელჩი ლატვიის რესპუბლიკაში ირაკლი ყურაშვილი დაესწრო.
ქართული ღვინის საექსპორტო ბაზრების დივერსიფიცირების მიზნით, ღვინის ეროვნული სააგენტოს ფინანსური და ორგანიზაციული მხარდაჭერით, 2023 წელს ქართული ღვინო ამერიკის შეერთებულ შტატებში, დიდ ბრიტანეთში, გერმანიაში, პოლონეთში, ბალტიისპირეთის ქვეყნებში, ჩინეთში, სამხრეთ კორეასა და იაპონიაში აქტიურად არის წარმოდგენილი.