თბილისი, 28 სექტემბერი — Sputnik. აშშ-ის სახელმწიფო მდივანი ენტონი ბლინკენი სცენაზე გამოვიდა და ბენდთან ერთად შეასრულა ბლუზი, რითაც ახალი ინიციატივა „მუსიკალური დიპლომატია“ წარმოადგინა.
ახალი კულტურული დიპლომატიის ინიციატივა სახელწოდებით Global Music Diplomacy Initiative (გლობალური მუსიკალური დიპლომატიის ინიციატივა) სახელმწიფო დეპარტამენტს ეკუთვნის.
პრეზენტაციის ფარგლებში ბლინკენმა გიტარისტისა და ვოკალისტის როლი მოირგო და ანსამბლთან ერთად შეასრულა ბლუზის სტანდარტი Hoochie Coochie Man, რომელიც პირველად მადი უოტერსმა ჩაწერა 1950-იან წლებში.
ბლინკენი თავის სოციალურ ქსელებში წერდა, რომ მოყვარული გიტარისტია, მაგრამ ეს მისი პირველი საჯარო გამოსვლაა, როგორც მუსიკოსისა და უმაღლესი თანამდებობის პირისა ერთად.
„ინიციატივის მიზანია, გამოიყენოს საჯარო და კერძო პარტნიორობის შესაძლებლობები მუსიკალური ეკოსისტემის შესაქმნელად, რომელიც ხელს შეუწყობს ეკონომიკურ თანასწორობასა და შემოქმედებითობას, შექმნის შესაძლებლობებს და უზრუნველყოფს განათლების ხელმისაწვდომობას“, — ნათქვამია სახელმწიფო დეპარტამენტის კომუნიკეში.
როგორც ცნობილი ხდება, ინიციატივის ავტორებს ინგლისური ენის შესწავლის ხელშეწყობის მიზნით ამერიკული მუსიკისა და სიმღერების მსოფლიოს სხვადასხვა ქვეყნების სასწავლო პროგრამებში ჩართვა სურთ.
გარდა ამისა, ისინი ასევე იწყებენ ამერიკული მუსიკის მენტორობის პროგრამას (American Music Mentorship Program), რომელიც საშუალებას მისცემს საშუალო დონის არტისტებს, ჩავიდნენ შეერთებულ შტატებში და სპეციალისტებთან კონსულტაციები გაიარონ შემდგომი განვითარების მიზნით.
პროგრამის პირველი ეტაპი 2024 წლის შემოდგომაზე გაიმართება.