თბილისი, 26 სექტემბრი – Sputnik. ჩვენ ერთად აღარ ვართ - საქართველოს ყოფილ პირველ ლედის, სანდრა რულოვსს ორი წელიწადი დასჭირდა, სანამ ექს-პრეზიდენტსა და მეუღლესთან, მიხეილ სააკაშვილთან შეხვედრას გადაწყვეტდა „ვივამედის“ კლინიკაში და საჯაროდ აღიარებდა მასთან დაშორებას.
2021 წელს, დაკავებამდე ცოტა ხნით ადრე სააკაშვილმა საჯაროდ აღიარა, რომ ურთიერთობა აკავშირებდა უკრაინის უმაღლესი რადას დეპუტატ ელიზავეტა იასკოსთან. ამასთან უცნობი იყო, დაშორდა თუ არა სააკაშვილი სანდრა რულოვსს, რომელთანაც ქორწინებაში იმყოფებოდა და ზრდიდა ორ ვაჟს - ედუარდსა და ნიკოლოზს. სანდრა რულოვსის თქმით, სააკაშვილის იასკოსთან გამოქვეყნებული ვიდეო მოულოდნელი იყო და ამ ფორმით – მიუღებელი.
„ორი წელიწადი დამჭირდა მანამ, სანამ ფსიქოლოგიურად შევძლებდი მიშას მონახულებას. ჩვენ ერთად აღარ ვართ“, - დაწერა სანდრა რულოვსმა სააკაშვილის მონახულების შემდეგ.
ყოფილი პირველი ლედის თქმით, მათ შორის შედგა ხანგრძლივი შეხვედრა და გულწრფელი საუბარი.
„ვუსურვებ მას თავისუფლებას, ჯანმრთელობას და ბედნიერებას“, - დაწერა სანდრა რულოვსმა.
იასკოსთან კავშირი არ იყო ერთადერთი „დარტყმა“, რომელიც სააკაშვილმა ყოფილ მეუღლეს მიაყენა. დაკავებიდან მალევე გაირკვა, რომ მომღერალი სოფო ნიჟარაძე ყოფილი პრეზიდენტისგან ქალიშვილს ელის მარია სააკაშვილს ზრდის. რამდენიმე თვის შემდეგ იასკომაც განაცხადა, რომ სააკაშვილისგან შვილი ჰყავს. გოგონას ჟასმინი დაარქვეს.
სააკაშვილის სისხლის სამართლის საქმეები
სააკაშვილი საქართველოში უკრაინიდან არალეგალურად 2021 წლის 29 სექტემბერს დაბრუნდა. ის 1 ოქტომბერს თბილისში დააკავეს. მას უკვე მისჯილი აქვს 6 წლით თავისუფლების აღკვეთა დეპუტატ ვალერი გელაშვილის ცემისა და სანდრო გირგვლიანის მკვლელობაში მსჯავრდებულების შეწყალების საქმეებზე.
თბილისის საქალაქო სასამართლო მის წინააღმდეგ განიხილავს კიდევ სამ საქმეს – სახელმწიფო სახსრების გაფლანგვის, 2007 წლის 7 ნოემბრის აქციის დარბევისა და საზღვრის უკანონოდ გადმოკვეთის საქმეებს.
დაკავებიდან დღემდე სააკაშვილმა ციხის საკანში ნახევარ წელიწადზე ნაკლები დრო გაატარა, დანარჩენი პერიოდი იგი სხვადასხვა კლინიკაში იმყოფებოდა – ჯერ ციხის, შემდეგ სამხედრო ჰოსპიტალში, ახლა კი კლინიკა „ვივამედში".