ცნობილი იაპონელი მომღერალი ტოკიკო კატო მირზაანში ფიროსმანის მუზეუმს ეწვია

თბილისი, 24 აგვისტო — Sputnik. ცნობილი იაპონელი მომღერალი ტოკიკო კატო გენიალური ქართველი მხატვრის ნიკო ფიროსმანის მუზეუმს ეწვია მირზაანში.

ფიროსმანის სახლ-მუზეუმში კატომ მონაწილეობა მიიღო სახლებისა და ეზოების ფასადების მოხატვაში ფიროსმანის შემოქმედების მოტივებზე. პროექტის ინიციატორია მუზეუმის საგანმანათლებლო პროგრამის სპეციალისტი, თვითნასწავლი მხატვარი ბელა ლობჟანიძე მხატვარი ბავშვების ჯგუფთან ერთად.

ტოკიკო კატო 79 წლის მომღერალი, კომპოზიტორი, სიმღერების ტექსტის ავტორი და მსახიობია. მისი დებიუტი 1965 წელს შედგა და ამას თავბრუდამხვევი წარმატებები მოჰყვა.

57-წლიანი მუსიკალური კარიერის განმავლობაში ტოკიკო კატომ გამოუშვა 80-ზე მეტი ალბომი, შექმნა უამრავი ჰიტი, რომლებიც დღემდე პოპულარულია.

სწორედ ტოკიკო კატოს შესრულებით მოიპოვა პოპულარობა იაპონიაში ალა პუგაჩოვას სიმღერამ „მილიონი ვარდი". სიმღერის ტექსტს საფუძვლად უდევს ფიროსმანის სიყვარულის ლეგენდა აქტრისა მარგარიტას მიმართ.