თბილისი, 22 აგვისტო — Sputnik. ჩრდილოეთ კორეა მზადაა ომის შემთხვევაში ყველა შესაძლო იარაღის, მათ შორის, ბირთვული იარაღის მობილიზებისთვის, განაცხადა სამხრეთ კორეის პრეზიდენტმა იუნ სოკ იოლმა სეულის და ვაშინგტონის ერთობლივი სამხედრო წვრთნების პირველ დღეს.
„იმისათვის, რომ ომში თავის მიზნებს მიაღწიოს, ჩრდილოეთ კორეა ყველა ხელმისაწვდომი საშუალების მობილიზებას ახდენს და მზად იქნება, გამოიყენოს ბირთვული იარაღი", — აღნიშნა იუნ სოკ იოლმა.
როგორც მან განმარტა, მიმდინარე წლიდან სამხედრო წვრთნები Ulchi ჩრდილოეთ კორეის მხრიდან პოტენციურ ბირთვულ თავდასხმაზე რეაგირებასაც მოიცავს.
სამხრეთ კორეის პრეზიდენტი დარწმუნებულია, რომ მშვიდობის მიღწევა მხოლოდ „აბსოლუტური ძალის" მეშვეობითაა შესაძლებელი და პირობა დადო, რომ კორეის მხრიდან ნებისმიერი პროვოკაცია დაუყოვნებლივ დაისჯება.
სამხრეთ კორეისა და აშშ-ის ერთობლივი სამხედრო წვრთნები Ulchi Freedom Shield ორშაბათს დაიწყო. იმავე დღეს ჩრდილოეთ კორეის ლიდერმა კიმ ჩენ ინმა ქვეყნის სამხედრო-საზღვაო ძალებს მუდმივი საბრძოლო მზადყოფნა უბრძანა. მისი თქმით, ნებისმიერი სამხედრო სწავლება — ომისთვის სამზადისია.
უფრო ადრე ჩრდილოეთ კორეის თავდაცვის მინისტრმა კან სუნ ნამმა მოსკოვის საერთაშორისო უსაფრთხოების XI კონფერენციაზე განაცხადა, რომ კორეის ნახევარკუნძულზე ბირთვული ომის თავიდან აცილება შეუძლებელია და ეს მხოლოდ დროის საკითხია.
წყარო: Yonhap News