მსახიობი გოგი ხარაბაძე გარდაიცვალა

თბილისი, 17 აგვისტო – Sputnik. მსახიობი და რეჟისორი გოგი ხარაბაძე 81 წლის ასაკში გარდაიცვალა. ამის შესახებ ინფორმაციას სოციალურ ქსელში რუსთაველის თეატრი ავრცელებს.

გოგი ხარაბაძე 1963-1994 წლებში იყო რუსთაველის თეატრის მსახიობი. შესრულებული აქვს როლები სპექტაკლებში: ჯარისკაცი („ყვარყვარე თუთაბერი“), დათო („ვახშმობის წინ“), ოთარი („ბრალდება“), ღვთისო („მოკვეთილი“), დიტო („სანამ ურემი გადაბრუნდება“), ჯიბო („გუშინდელნი“), ოიდიპოსი („ოიდიპოს მეფე“), ჯორჯ კლარენსი („რიჩარდ მესამე“) და სხვ.

განსახიერებული აქვს კინოროლები: ოთარი („გიორგობისთვე“), კაზა ჩხეტია („დათა თუთაშხია“), ნოდარი („ჩემი მეგობარი ნოდარი“), ჰერცოგი („დონ კიხოტი“), თენგიზი („გასეირნება ყარაბაღში“) , მერაბ სეთურიძე („რაიკომის მდივანი“), მირიან ტაბიძე („გამოცხადება“) და სხვ. გადაღებულია ვიდეოფილმებში: „ირინეს ბედნიერება“ (აბესალომ), „ოთარაანთ ქვრივი“ (გიორგი და სოსია), „სატელევიზიო ოთხთავი“ (1996) და სხვ.

ხარაბაძეს შექმნილი აქვს ტელეთეატრის ციკლი: პოეზიის 30 წუთი, „ბედი ქართლისა“, აკაკი წერეთლის მონოლოგი, ვაჟა-ფშაველას ნაანდერძევი და სხვ. ფირფიტაზე ჩაწერილი აქვს „ვეფხისტყაოსანი“, „გალობანი სინანულისანი“.

გოგი ხარაბაძე რვა წიგნის ავტორია: „თქვენ მომაგონდით“, „კოქსართროზი“, „წყნარად, წარსულო, წყნარად“, „მოთხრობები და მიძღვნები“, „სისხლიანი მეოცე“, „პირველი“, „თამადა“, „სახლი რუსთაველზე“.

გოგი ხარაბაძე იყო საქართველოს დამსახურებული არტისტი, საქართველოს სახალხო არტისტი, შოთა რუსთაველის სახელობის სახელმწიფო პრემიისა და დავით კლდიაშვილის სახელობის პრემიის ლაურეატი. მიღებული ჰქონდა ჯილდოები: ხელოვნების ქურუმი, ხელოვნებაში შეტანილი განსაკუთრებული წვლილისთვის; პრემია „საგურამო“ .