თბილისში ბინებზე ფასები იზრდება - ახალი სტატისტიკა

თბილისი, 25 ივლისი — Sputnik. თბილისში ახალ საცხოვრებელ ბინებზე ფასების წლიური ინდექსი 2023 წლის მეორე კვარტალში 13,1%-ით გაიზარდა, ხოლო 2023 წლის პირველ კვარტალთან შედარებით ფასები 3%-ით გაიზარდა, იუწყება სტატისტიკის ეროვნული სამსახური „საქსტატი".

საცხოვრებელ უძრავ ქონებაზე ფასების ინდექსი ფასების დინამიკას ასახავს და მოიცავს ახლად აშენებულ და მშენებარე უძრავ ქონებას თბილისში.

2020 წლის საშუალოწლიურ მაჩვენებელთან შედარებით, თბილისში ახალ საცხოვრებელ ბინებზე ფასების წლიური ინდექსი მეორე კვარტალში 28,8%-ით გაიზარდა.

"საქსტატის" მონაცემებით, ახალაშენებული ბინების ფასების ზრდამ მიმდინარე წლის მეორე კვარტალში, 2023 წლის პირველ კვარტალთან შედარებით 3,4% შეადგინა, ხოლო 2022 წლის მეორე კვარტალთან შედარებით ის 10,6%-ით გაიზარდა.

თბილისში ახალაშენებულ კერძო სახლებზე ფასები მეორე კვარტალში, 2023 წლის პირველ კვარტალთან შედარებით, 1,6%-ით გაიზარდა, ხოლო 2022 წლის მეორე კვარტალთან შედარებით – 16,2%-ით.

„საქსტატის" კვლევის თანახმად, 2023 წლის მეორე კვარტალში ერთი კვადრატული მეტრის საშუალო ფასი ახლად აშენებულ კორპუსებში შეადგენს: ე.წ. შავი კარკასი – 2.629 ლარს, თეთრი კარკასი – 2.875 ლარს, მწვანე კარკასი – 3.350 ლარს. 2022 წლის მეორე კვარტალში ფასები ასეთი იყო: შავი კარკასი – 2.216 ლარი, თეთრი – 2.505, მწვანე – 2.920 ლარი.

ფასების ინდექსი მაკროეკონომიკური და ფინანსური სტაბილურობის მნიშვნელოვანი ინდიკატორია და მას უმეტესად საქართველოს ეროვნული ბანკი და კერძო დეველოპერები იყენებენ.

ის, ერთი მხრივ, ემსახურება უძრავი ქონების განვითარებისა და ბაზრის რისკების შეფასებას, ხოლო მეორე მხრივ – უძრავი ქონების ბაზარსა და ფინანსურ სტაბილურობასთან კავშირების დადგენასა და შეფასებას.