თბილისი, 20 ივლისი — Sputnik. ყირგიზეთის სახელმწიფო სტრუქტურები არ არიან ჩართული აშშ-ისა და დასავლეთის ქვეყნების მიერ რუსეთის წინააღმდეგ დაწესებული სანქციების დარღვევაში, იუწყება „Sputnik–ყირგიზეთი“ რესპუბლიკის ეროვნული უშიშროების სახელმწიფო კომიტეტის პრეს-სამსახურის განცხადებაზე დაყრდნობით.
მანამდე გამოცემა Washington Post-მა გაავრცელა ინფორმაცია, რომ თეთრი სახლი ეკონომიკურ სანქციებს ამზადებს, რათა აიძულოს ყირგიზეთი, შეწყვიტოს სანქცირებული საქონლის სავარაუდო ექსპორტი რუსეთში.
„დადასტურებით შეგვიძლია ვთქვათ, რომ არც ყირგიზეთის სახელმწიფო და არც რომელიმე სახელმწიფო სტრუქტურა თუ კომპანია არ არის ჩართული აშშ-ის და დასავლეთის ქვეყნების მიერ რუსეთის წინააღმდეგ დაწესებული სანქციების რეჟიმის დარღვევაში“, — ნათქვამია ეროვნული უშიშროების სახელმწიფო კომიტეტის განცხადებაში.
უწყებაში ირწმუნებიან, რომ ყირგიზეთი და მისი სახელმწიფო სტრუქტურები მკაცრად იცავენ საერთაშორისო ნორმებსა და წესებს, თუმცა არ გამორიცხავენ, რომ სანქციებით გათვალისწინებული შეზღუდვები კერძო კომპანიებს დაერღვიათ, რომლებმაც არ იციან, ვინ იქნება მათ მიერ მიწოდებული პროდუქციის საბოლოო მომხმარებელი.
როგორც ყირგიზეთის ეროვნული უშიშროების სახელმწიფო კომიტეტი აცხადებს, მსგავსი ქმედებების დადგენისა და შეწყვეტის მიზნით უკვე დაწყებულია შესაბამისი საქმის წარმოება.
წყარო: Sputnik–ყირგიზეთი