თბილისი, 2 ივლისი – Sputnik. ესპანეთში გამართულ 20-წლამდელთა ევროპის ჩემპიონატზე ჭიდაობაში ქართველმა თავისუფალი სტილით მოჭიდავეებმა ერთბაშად ოთხი მედალი მოიპოვეს - ოქრო, ორი ვერცხლი და ბრინჯაო, იუწყება საქართველოს ჭიდაობის ფედერაციის პრესსამსახური.
თავისუფალი სტილით მოჭიდავე ოთარ ადეიშვილმა (79 კგ) ოქროს მედალი მოიპოვა. ფინალში დაძაბულ ბრძოლაში მან გერმანელი გრეგორ ეიგენბროტი ანგარიშით 10:7 დაამარცხა.
კიდევ ორმა ქართველმა მოჭიდავემ - გოგა ოთინაშვილმა (65 კგ) და საბა კობახიძემ (70 კგ) - ვერცხლის მედლები მოიპოვა. ნიკა ფანცულაიამ (97 კგ) ფინალურ ბლოკში მესამე ადგილისთვის ბრძოლაში სომეხი სპორტსმენი გურგენ სიმონიანი ანგარიშით 5:2 დაამარცხა და ბრინჯაოს მედალი მოიპოვა.
კონტინენტურ ჩემპიონატზე დარჩენილ ხუთ წონით კატეგორიაში მოასპარეზე ხუთი ქართველი სპორტსმენიდან ბრინჯაოს მედლის მოპოვების შანსი მხოლოდ გიორგი რომელაშვილს (86 კგ) და თორნიკე სამხარაძეს (92 კგ) აქვთ.
ბერძნულ-რომაულ ჭიდაობაში 20 წლამდელთა ევროპის ჩემპიონატზე, რომელიც სამი დღის წინ ესპანეთში დასრულდა, საქართველოს ნაკრების წევრებმა სამი ოქროს, ერთი ვერცხლის და ერთი ბრინჯაოს მედალი მოიპოვეს.