ნიკა გვარამია თავისუფალია

თბილისი, 23 ივნისი – Sputnik. ოპოზიციური ტელეკომპანია „მთავარი არხის“ დამფუძნებელმა და გენერალურმა დირექტორმა ნიკა გვარამიამ გათავისუფლებისთანავე განაცხადა, რომ საქართველოს პრეზიდენტმა სალომე ზურაბიშვილმა შეწყალების აქტს ხელი მოაწერა არა მისთვის, არამედ ქვეყნისთვის.

ზურაბიშვილმა შეწყალების აქტს ხელი ხუთშაბათს, 22 ივნისს მოაწერა. 15 ივნისს საქართველოს პრეზიდენტმა განაცხადა, რომ არ აპირებს დაემორჩილოს გარე ზეწოლას არც სააკაშვილის საკითხზე და არც ოპოზიციური „მთავარი არხის“ დამფუძნებლის ნიკა გვარამიას შეწყალების საკითხზე, რომელიც მსჯავრდებულია ტელეკომპანია „რუსთავი 2“-ის თანხების გაფლანგვის საქმეზე იმ პერიოდში, როდესაც ამ არხის გენერალური დირექტორი იყო.

მისი თქმით, ეს გადაწყვეტილება მისთვის მოულოდნელი აღმოჩნდა.

„პირველი შთაბეჭდილება - გულწრფელად გეტყვით, რომ არ ველოდი გათავისუფლებას. არ ვიყავი ამისთვის მზად“, - განაცხადა გვარამიამ.

ამასთან, მან ზურაბიშვილს ბოდიში მოუხადა იმ ვიდეოებისთვის, რომლებშიც ის მისი მისამართით უცენზურო ლექსიკას იყენებს. ეს არის ძველი ვიდეოები, რომლებიც ხუთშაბათს პრეზიდენტის მიერ გამოცხადებული გადაწყვეტილების შემდეგ სოციალურ ქსელებში აქტიურად გავრცელდა.

საუბარია ტელეკომპანია „რუსთავი2“-სთვის 6,8 მილიონი ლარის ზარალის მიყენებაზე მაშინ, როდესაც მისი გენერალური დირექტორი ნიკა გვარამია იყო. 2022 წლის 16 მაისს თბილისის საქალაქო სასამართლომ გვარამია დამნაშავედ ცნო. დაცვის მხარემ განაჩენი გაასაჩივრა სააპელაციო სასამართლოში, რომელმაც პირველი ინსტანციის გადაწყვეტილება ძალაში დატოვა. შემდეგ ადვოკატებმა საჩივარი შეიტანეს უზენაეს სასამართლოში, რომელმაც გვარამიას საქმეზე სააპელაციოს გადაწყვეტილება ძალაში დატოვა და საჩივარი დაუშვებლად ცნო.

ორივე ინსტანციის სასამართლომ საქმის ორ ეპიზოდში გვარამია დამნაშავედ ცნო სამსახურებრივი უფლებამოსილების ბოროტად გამოყენებაში. ერთადერთი განსხვავება ისაა, რომ სააპელაციო სასამართლომ სასჯელი გაამკაცრა ერთ-ერთ ეპიზოდზე – 50 ათას ლარიანი ჯარიმა 3,5 წლით თავისუფლების აღკვეთით შეიცვალა. მაგრამ იმის გათვალისწინებით, რომ მეორე ეპიზოდისთვისაც სასჯელი 3,5 წლიანი პატიმრობაა, საქართველოს კანონმდებლობით, საბოლოო სასჯელი უცვლელი დარჩა.

ბრალდების მხარე ამტკიცებდა, რომ ნიკა გვარამია ბრალდებულია სსკ-ის ოთხი მუხლით: „წინასწარი შეთანხმებით ჯგუფის მიერ დიდი ოდენობით კუთვნილი ქონებრივი უფლების გაფლანგვა“, „კომერციული მოსყიდვა“, „ყალბი ოფიციალური დოკუმენტის დამზადება“, „უკანონო შემოსავლის ლეგალიზაცია“.

„მთავარი არხის“ ჟურნალისტები და ოპოზიციონერები დარწმუნებული არიან, რომ ეს პოლიტიკურად მოტივირებული გადაწყვეტილებაა.

მმართველ პარტიაში არაერთხელ განაცხადეს, რომ გვარამიამ თანხების „გადაქაჩვა“ ტელეკომპანიიდან მაშინ დაიწყო, როცა მისი დაბრუნება ყოფილმა მფლობელმა ქიბარ ხალვაშმა გადაწყვიტა. ხალვაშის თქმით, გვარამიას მთავარი მიზანი „რუსთავი 2“-ის გაკოტრება იყო, რათა კომპანიის დაბრუნებას კანონიერი მფლობელისთვის აზრი დაეკარგა.

საქმის მასალების თანახმად, ნიკა გვარამია, როდესაც „რუსთავი2“-ის გენერალური დირექტორი იყო (2019 წლის ივლისამდე), მოქმედებდა ტელეკომპანიის ინტერესების საზიანოდ, რათა კომპანია „ინტერ მედია პლუსს“, რომელიც მის მეგობრებს ეკუთვნის, მრავალმილიონიანი მოგება მიეღო. სწორედ ამ კომპანიასთან გაფორმდა 2015 წლის იანვარში შეთანხმება, რომლითაც მას ტელეარხის ეთერში რეკლამის განთავსების უფლება მიენიჭა.

2015 წლის იანვრიდან აგვისტოს ჩათვლით გვარამია „ინტერ მედია პლუსისგან“ ითხოვდა სარეკლამო დროის გაყიდვის შედეგად მიღებული შემოსავლის 90-95%-ს, ხოლო მას შემდეგ, რაც 5 აგვისტოს არხის ყოფილმა მფლობელმა ქიბარ ხალვაშმა გამოთქვა პრეტენზია არხის დაბრუნებაზე, „ინტერ მედია პლუსისგან“ დაიწყეს მხოლოდ მინიმალური თანხის მოთხოვნა, რაც „რუსთავი 2“-ის არსებობისთვის იყო აუცილებელი.

შედეგად – 2015 წელს „რუსთავი 2“-ის ანალოგიური მომსახურებიდან მიღებული შემოსავალი აღმოჩნდა 6.763.509 ლარით ნაკლები, ვიდრე ერთი წლით ადრე.

საქმის მეორე ეპიზოდში საუბარია ძვირადღირებული ავტომობილის შეძენაზე. პროკურატურის განცხადებით, 2019 წლის თებერვალში გვარამიამ „პორშეს“ ცენტრში თავისთვის და თავისი ოჯახისთვის აირჩია 76,7 ათას ევროდ ღირებული Porsche Macan S – „რუსთავი 2“-ის ეთერში სარეკლამო რგოლების განთავსების სანაცვლოდ.

ეს ოპერაცია გვარამიას ნდობით აღჭურვილი პირის მეშვეობით ჩატარდა, ტელეკომპანიის კანონიერი ინტერესების საზიანოდ.

ამ ბარტერის გარდა, გვარამია „პორშეს“ ცენტრის ხელმძღვანელობას დაჰპირდა, რომ მომავალშიც განათავსებდა სარეკლამო რგოლებს დაბალ ფასად სარეკლამო სააგენტო „პრო ექსპო მედიას“ მეშვეობით.