თბილისი, 22 ივნისი — Sputnik. რუსეთის პრეზიდენტის პრეს-მდივანი დმიტრი პესკოვი მიიჩნევს, რომ, მიუხედავად თარგმანის სირთულისა, დასავლეთმა სწორად გაიგო ვლადიმირ პუტინის ფრაზა хрен им, რომელიც ბირთვული იარაღის შემცირების შესახებ დასავლეთის მოწოდებებს შეეხებოდა.
„ინგლისურ ენაში არსებობს მთელი რიგი იდიომები, გამონათქვამები და ფრაზები, რომელთა სიტყვა სიტყვით თარგმნა რუსულად და პირიქით პრაქტიკულად შეუძლებელია. ეს ნორმალური ლინგვისტური ფენომენია და ამაზე გამოკიდება საჭირო არ არის. მათ გაიგეს მთავარი მნიშვნელობა“, — განაცხადა პესკოვმა.
ვლადიმირ პუტინმა აღნიშნული ფრაზა 16 ივნისს წარმოთქვა სანქტ-პეტერბურგის ეკონომიკური ფორუმის დროს.
„ჩვენ უფრო მეტი [ბირთვული] იარაღი გვაქვს, ვიდრე ნატოს ქვეყნებს. მათ იციან ამის შესახებ და მუდმივად გვარწმუნებენ, რომ მოლაპარაკება დავიწყოთ მათ შემცირებაზე. როგორც ჩვენი ხალხი ამბობს, Хрен им, გასაგებია?“ — განაცხადა მაშინ პუტინმა.
მოგვიანებით კრემლმა განმარტა, რომ რუსეთის პრეზიდენტის სიტყვები არ ნიშნავს იმას, რომ რუსეთი უარს ამბობს აშშ-თან ბირთვული შეიარაღების კონტროლის შესახებ დიალოგზე. დასავლურ მედიასაშუალებათა ნაწილმა ეს სიტყვები ახლო შინაარსის მქონე უხამს გამონათქვამად გადათარგმნა, ნაწილმა კი გამოიყენა ფრაზა the hell with them („ჯოჯოხეთშიც წასულან“).
სტრატეგიული შეტევითი იარაღის შემდგომი შემცირებისა და შეზღუდვის ღონისძიებების შესახებ ხელშეკრულებაში (START) მონაწილეობის შეჩერების შესახებ რუსეთის პრეზიდენტმა მიმდინარე წლის 21 თებერვალს გამოაცხადა. ხელშეკრულებას მოქმედების ვადა ოფიციალურად 2026 წლის თებერვალში ეწურება.