თბილისი, 12 ივნისი – Sputnik. იტალიური „ნაპოლის“ ქართველი ნახევარმცველი ხვიჩა კვარაცხელია 2022/23 წლის სეზონის ჩემპიონთა ლიგის საუკეთესო ახალგაზრდა მოთამაშედ დასახელდა. ინფორმაცია ამის თაობაზე უეფას ოფიციალურ ვებ-გვერდზე გამოქვეყნდა.
წელს „ნაპოლი“ პირველად ისტორიაში ჩემპიონთა ლიგის ¼ ფინალურ სტადიაზე გავიდა. კვარაცხელიამ ტურნირის ცხრა მატჩში გაიტანა ორი გოლი და გააკეთა ოთხი შედეგიანი გადაცემა.
მანამდე 22 წლის კვარაცხელია იტალიის ჩემპიონატის ამავე სეზონის საუკეთესო მოთამაშედ დასახელდა.
კვარაცხელიამ სერია А-ში სადებიუტო სეზონში „ნაპოლისთვის“ გაიტანა 12 გოლი და გააკეთა 10 შედეგიანი გადაცემა.
ის მეორე ქართველი ფეხბურთელია, რომელმაც იტალიის ჩემპიონატი მოიგო. მანამდე „მილანის“ შემადგენლობაში სკუდეტო მოიგო კახა კალაძემ.