თბილისი, 5 ივნისი — Sputnik. პირველად საქართველოში მარტვილის კანიონისა და ოკაცეს კანიონში ჩანჩქერის მონახულება განათების თანამედროვე სისტემის წყალობით ღამის საათებშიც იქნება შესაძლებელი, განაცხადა დაცული ტერიტორიების სააგენტოს თავმჯდომარის მოადგილემ თამარ ხახიშვილმა პრესკონფერენციაზე.
ბუნებაში მოგზაურობა რისკებთან არის დაკავშირებული, ამიტომ აქამდე მარტვილის კანიონის ტერიტორიის მონახულება 19:00 საათამდე იყო დაშვებული. ახლა კი, 3D განათების სისტემის დამონტაჟების შემდეგ ამ ტერიტორიებზე ვიზიტორების შეშვება 22:00–23:00 საათამდე იქნება შესაძლებელი, აღნიშნა ხახიშვილმა.
„ესაა სრულიად ახალი პროდუქტი, რომელსაც ვიზიტორებს შევთავაზებთ. ვიზიტორები საღამოს საათებშიც შეძლებენ იხილონ როგორც მარტვილის კანიონი, ასევე ოკაცეს ჩანჩქერი", – განაცხადა ხახიშვილმა მედიაჰოლდინგ „კვირის" პრეს-კლუბში.
ღამის საათებში ამ ადგილების მონახულება სრულიად განსაკუთრებულ შთაბეჭდილებებს დატოვებს ადამიანებზე, აღნიშნა მან.
მარტვილის კანიონი ქალაქიდან ხუთი კილომეტრის მანძილზე მდებარეობს, სოფელ გაჭედილის სამხრეთით. კანიონში მიედინება მდინარე აბაშა. თავად კანიონი ზედა და ქვედა ნაწილებისგან შედგება, რომლებიც მეჩეჩით იყოფა. ზედა ნაწილში ნავებით სეირნობაა შესაძლებელი, ქვემოთ კი ცურვის მსურველები იყრიან ხოლმე თავს.
მარტვილის კანიონი
© courtesy of Abazzi Atelier
ოკაცეს კანიონი ქუთაისიდან 50 კილომეტრში, ხონის მუნიციპალიტეტში, მდინარე ოკაცეს ხეობაში მდებარეობს. მდინარე გამოირჩევა მიწისქვეშა დინებებით და აყალიბებს კარსტულ მღვიმეებს. კანიონის სიგრძე 16 კილომეტრია, სიღრმე – 50 მ. კანიონში უამრავი ტბა და ჩანჩქერია. ერთ-ერთი ტბის – ოსხაპოს სიგრძე 60 მეტრია.
კინჩხის ჩანჩქერი
© courtesy of Nika Shaishmelashvili
განსაკუთრებული სილამაზით გამოირჩევა კინჩხის სამკასკადიანი ჩანჩქერი, რომელიც პარკის ტერიტორიაზე მდებარეობს. ეს საქართველოში ერთ-ერთი ყველაზე მაღალი ჩანჩქერია. პირველი კასკადის სიმაღლე 25 მეტრია, მეორის – 70, ხოლო მესამის – 35 მეტრი.