ამბობენ, რომ თითოეული ადამიანისთვის სხვადასხვა რაოდენობის საკვები მიიჩნევა იდეალურად, რომ ეს აუცილებლად სპეციალისტმა უნდა განსაზღვროს, რომ ექიმ–დეიტოლოგთან კონსულტაციის გარეშე დაწყებული დიეტა სახიფათოა…
კი, ბატონო, არაფერი გვაქვს საწინააღმდეგო. ჩვენ უბრალოდ შევეცდებით, ჩვენი წვლილი შევიტანოთ თქვენს გახდომა–გატანწერწეტებაში. მით უმეტეს, რომ დღეს–ხვალ, ზაფხული მთელი ძალით შემოაბიჯებს და სამოსის შეძლებისდაგვარად შემოძარცვამდე სხეულის გალამაზება არავის გვაწყენს.
დიდი ბრიტანეთის დიეტოლოგთა ასოციაციის მეცნიერებმა დაადგინეს, რომ ადამიანმა იმდენი უნდა ჭამოს, რამდენიც… მის ხელისგულზე დაეტევა.
ნუ აჰყვებით ფორმულას: ჯანსაღი საკვები არ ასუქებს. თურმე ასუქებს, თუკი დიდი რაოდენობით მიირთმევთ.
ასოციაციის წევრმა დიეტოლოგმა შონ პორტერმა გამოთვალა, რა რაოდენობის ცილები, ცხიმები და ნახშირწყლები უნდა მიიღოს ადამიანმა ყოველდღიურად და დაადგინა, რომ:
• ხორცის ნაჭერი უნდა იყოს იმხელა, რამხელაც თქვენი ხელისგულია — თითების გარეშე. ნუ დაფრთხებით. თუ დიდი ტანისა ბრძანდებით, ესე იგი, ხელებიც დიდი გაქვთ და, რაღა თქმა უნდა, ხელისგულიც. შესაბამისად, ხორცის ნაჭერიც კარგა მოზრდილი გამოვა.
• თევზი — თუ ნაკლებცხიმიანია, შეგიძლიათ ხელისგულს თითების სიგრძეც მიათვალოთ და ამ ზომის ნაჭერი მიირთვათ.
• სალათის ფურცლები, მწვანილი — შეგიძლიათ მიირთვათ ყოველ ჯერზე, რამდენჯერაც ჭამას გადაწყვეტთ, თანაც ბლომად. წარმოიდგინეთ, რამდენი დაგეტევათ ორივე პეშვში. კვირაში ეს ლამის მთელი ტომარაა.
• კენკროვანი ხილი — დღის განმავლობაში არ უნდა აღემატებოდეს 80 გრამს, რაც სწორედ იმდენია, რამდენიც თქვენს ორივე პეშვში ეტევა.
• ბოსტნეული — მაგალითად, კარტოფილი, ბროკოლი, ყვავილოვანი კომბოსტო… იმხელა უნდა იყოს, რამხელაც თქვენი მუჭია.
• მაკარონი, წიწიბურა, ბრინჯი — იმდენი, რამხელაც თქვენი მუჭია, ოღონდ გაზომეთ აუცილებლად მშრალ მდგომარეობაში.
• ნუში, კაკალი, თხილი — ერთი პეშვი. ოღონდ მიირთვით სათითაოდ, ნება–ნება, რათა ორგანიზმმა უკეთ აითვისოს.
• შოკოლადი — საჩვენებელი თითის სიგრძე.
• კარაქი, ცხიმი — ნებისმიერი სახისა, ცერა თითის ტოლი.
• ყველი — ერთ ჯერზე დაახლოებით 30 გრამის მიღებაა რეკომენდებული, ანუ ორივე ცერა თითის ტოლი ნაჭრისა.
• ნამცხვარი, ხაჭაპური — გაშალეთ საჩვენებელი და შუა თითი, შეატყუპეთ ისინი და დაატოლეთ ნაჭერს. ეს დაახლოებით 185 კალორიის ტოლია.
დაბოლოს, შონ პორტერი ირწმუნება, რომ თუ ბრიტანელი დიეტოლოგების რჩევებს გაითვალისწინებთ, ჭარბი წონის პრობლემა არასდროს შეგაწუხებთ.