რა წესები იმოქმედებს საქართველოში პარაპლანით ფრენისას? დეტალები

თბილისი, 14 მაისი – Sputnik. საქართველოში პარაპლანით ფრენის ახალი წესები გამოქვეყნდა - მხოლოდ მათი დაცვის შემთხვევაში კომპანიები გაუწევენ მსურველებს ამ ტიპის გართობის სერვისს.

როგორც პარაპლანიტის ფედერაციაში აცხადებენ, ფრენების აღსადგენად მათ დაახლოებით თვენახევარი დასჭირდებათ, ისიც კომპანიებისა და პილოტების მხრიდან მაღალი მოთხოვნის შემთხვევაში.

ახალი წესების მიხედვით, ერთ ლოკაციაზე ოპერირებას შეძლებს მხოლოდ ერთი კომპანია, რომელსაც გარკვეული პერსონალი ეყოლება.

ხელმძღვანელს დამხმარე თითოეულ სასტარტო მოედანზეც უნდა ჰყავდეს, მასაც უნდა ჰქონდეს სპეციალური კურსების გავლის დამადასტურებელი სერტიფიკატი.

კომპანიას უნდა ჰყავდეს მძღოლი, რომელიც ორ წელიწადში ერთხელ გაივლის პირველადი სამედიცინო დახმარების კურსებს.

თითოეულ კომპანიას უნდა ჰყავდეს მინიმუმ ერთი სატრანსპორტო საშუალება, რადიოკავშირის საშუალებები და რადიოსადგური ჩამწერის ფუნქციით, ქარის სიჩქარის მზომი, მობილური ტელეფონი, ინტერნეტქსელში ჩართული, მინიმუმ, ერთი ელექტრონული მოწყობილობა, პორტატული დამტენი (Power Bank) მობილური ტელეფონისა და სხვა საკომუნიკაციო საშუალებებისთვის, ალკო- და ნარკოტესტები.

კომპანიას ადგილზე უნდა ჰქონდეს პირველადი გადაუდებელი სამედიცინო დახმარების ნაკრები, სადაც იქნება სამაშველო თოკი, კისრის/მოტეხილი კიდურის ფიქსატორი, სამაშველო დაფა, სადეზინფექციო საშუალებები, ტკივილგამაყუჩებელი აბები, სისხლდენის შემაჩერებელი საშუალებები, ბინტი/დოლბანდი, ბამბა, წნევისა და სიცხის საზომი საშუალებები.

ერთწლიანი სერტიფიკატის მისაღებად, რომელიც პარაპლანით ფრენების ნებართვას იძლევა, კომპანიამ უნდა წარადგინოს ფრენების პირობები, თანამშრომლების რაოდენობა, ცნობა ნარკოლოგიური აღრიცხვიანობის შესახებ და სერტიფიცირებისთვის დადგენილი საფასურის გადახდის დამადასტურებელი ქვითარი.

წესების მიხედვით, პარაპლანით ფრენა იქნება შეზღუდული კონკრეტული ლოკაციებით, რომელიც შემოწმებას დაექვემდებარება და რაზეც გაიცემა უსაფრთხოების სერტიფიკატები.

სერტიფიკატში იქნება მითითებული კონკრეტული ლოკაციის ყველა მონაცემი, მათი ფართობი და მესაკუთრე. ლოკაციის უსაფრთხოება განისაზღვრება ასევე რელიეფით, მეტეოროლოგიური პირობებითა და საცდელი ფრენების გზით.

ფრენას შეძლებენ შემდეგი კატეგორიების მქონე პილოტები: PGS Single, PGT Tandem, PPGS Single, PPGT Tandem და T&FD. ამასთან კომერციულ ფრენებს განახორციელებენ მხოლოდ PGT Tandem და PPGT Tandem-ის კატეგორიების მქონე პილოტები.

პირს კატეგორია ენიჭება გამოცდის ჩაბარების ან პარაგლაიდინგის ფედერაციის მიერ უცხოეთში გაცემული სერტიფიკატის აღიარების შედეგად. ამასთან პილოტები შეძლებენ პარაპლანებით, რომელთა ვარგისიანობა დადასტურებულია ფედერაციის მიერ.

ფრენა დაშვებული იქნება მხოლოდ დღის საათებში, ხოლო მგზავრთან ერთად ფრენა დაიშვება მხოლოდ მას შემდეგ, რაც ის შეავსებს სპეციალურ ფორმას და თავის ფხიზელ მდგომარეობას დაადასტურებს.

ყველა ფრენა აღირიცხება და კანონით განსაზღვრული წესებით განხორციელდება.