თბილისი, 7 მაისი — Sputnik. სიტუაცია ზაპორიჟიეს ატომური ელექტროსადგურის რაიონში, რომელიც რუსული ჯარების კონტროლს ექვემდებარება, სულ უფრო ნაკლებად პროგნოზირებადი და „პოტენციურად საშიში“ ხდება, აცხადებს ატომური ენერგიის საერთაშორისო სააგენტოს (IAEA) გენერალური დირექტორი რაფაელ გროსი.
როგორც IAEA-ს ვებგვერდზეა აღნიშნული, გროსიმ მიიღო ინფორმაცია, რომ რუსეთმა ენერგოდარიდან მოსახლეობის გაყვანა დაიწყო. შესაბამისად, ორგანიზაცია ყურადღებით აკვირდება მოვლენებს ბირთვულ უსაფრთხოებაზე პოტენციური ზემოქმედების კუთხით.
IAEA-ს ხელმძღვანელი ღრმა შეშფოთებას გამოთქვამს აეს-ის გარშემო დაძაბულობის ზრდისა და გაუარესებული პირობების გამო, რომელშიც ევროპის უდიდესი ატომური ელექტროსადგურის თანამშრომლები და მათი ოჯახები იმყოფებიან.
„ზაპოროჟიეს ატომური ელექტროსადგურის რაიონში ზოგადი სიტუაცია სულ უფრო არაპროგნოზირებადი და პოტენციურად საშიში ხდება. მე უკიდურესად შეშფოთებული ვარ ბირთვული უსაფრთხოების რეალური რისკებით, რომლებსაც სადგური აწყდება. ჩვენ უნდა ვიმოქმედოთ ახლა, რათა თავიდან ავიცილოთ სერიოზული ბირთვული საფრთხე და მისი შედეგები მოსახლეობასა და გარემოზე. ეს დიდი ბირთვული ობიექტი დაცული უნდა იყოს“, — აღნიშნა რაფაელ გროსიმ.
მისი თქმით, IAEA დაჟინებით მოითხოვს ყველა მხარისგან იმ ვალდებულებების შესრულებას, რომლებიც სასიცოცხლო მიზანს — ბირთვულ უსაფრთხოებას უკავშირდება.