დედაქალაქში წიგნის ფესტივალი Tbilisi International Book Festival გაიმართება

თბილისი, 2 მაისი — Sputnik. თბილისის წიგნის 25-ე საერთაშორისო ფესტივალი (Tbilisi International Book Festival) სტუმრებს საერთაშორისო საგამოფენო ცენტრ Expo Georgia-ს სივრცეში 25-28 მაისის პერიოდში უმასპინძლებს.

ტრადიციულად Expo Georgia-ს მე-11 პავილიონში წარმოდგენილი იქნება როგორც ქართული, ისე უცხოური გამომცემლობებისა და სხვადასხვა ორგანიზაციების სტენდები, მე-5 და მე-6 პავილიონებში კი – საბავშვო წიგნები და შესაბამისი აქსესუარები.

ფესტივალის ფარგლებში ორგანიზებული იქნება როგორც მთავარი სცენა ლიტერატურული ღონისძიებებისთვის, ისე საბავშვო შემეცნებით-გასართობი კუთხე ფესტივალის პატარა სტუმრებისთვის.

ფესტივალის სტუმრებს ასევე გაეცნობიან ქართველი არტისტების წიგნებს პროექტის „მსახიობები ლიტერატურისთვის“ ფარგლებში.

ვინც ფესტივალზე ვერ მოხვდება, ღონისძიებებს ვირტუალურ რეჟიმში დაესწრება - თბილისის წიგნის საერთაშორისო ფესტივალის გვერდზე სოციალურ ქსელებში პირდაპირი ტრანსლაცია განხორციელდება.

ფესტივალის მიზანი 1997 წლიდან უცვლელია – საქართველოში კითხვის პოპულარიზაცია და საგამომცემლო სექტორის განვითარება.

ტრადიციულად ფესტივალის ყოველწლიური მონაწილეები არიან ქართველი და უცხოელი გამომცემლები, უნივერსიტეტები, სკოლები, წიგნის მაღაზიები, ბიბლიოთეკები, საელჩოები, არასამთავრობო, სამთავრობო და საერთაშორისო ორგანიზაციები.

ფესტივალის ძირითადი ნაწილი წიგნის ბაზრობაა, სადაც დამთვალიერებელს ელოდება წიგნების ფართო ასორტიმენტი და აქსესუარები მნიშვნელოვანი ფასდაკლებით.