თბილისი, 27 აპრილი – Sputnik. ქართული ლიტერატურა პირველად იქნება წარმოდგენილი ბუენოს-აირესში 47-ე წიგნის საერთაშორისო გამოფენაზე, რომელიც 27 აპრილიდან 15 მაისამდე გაიმართება.
ბუენოს-აირესის წიგნის ბაზრობა 45 ათას კვადრატულ მეტრ ფართობზეა გაშლილი და ერთ-ერთი ყველაზე პოპულარული წიგნის ბაზრობაა ესპანურენოვან სამყაროში. ბაზრობა, რომელიც სამი კვირის განმავლობაში გრძელდება, მილიონზე მეტ მკითხველს და 12000-ზე მეტ საგამომცემლო სექტორის პროფესიონალს მასპინძლობს.
ფრანკფურტის წიგნის ბაზრობასთან თანამშრომლობით ბუენოს-აირესში კოლექტიურ სტენდზე წარმოდგენილია საქართველოს სტენდი სლოგანით „ევროპული ამბები“.
„ევროპული ამბების“ თაროებზე განთავსებულია ქართველი ავტორების უახლესი თარგმანები ესპანურ, ინგლისურ, გერმანულ და ფრანგულ ენებზე, რომლებიც მწერალთა სახლის ხელშეწყობით გამოიცა.
ქართული ლიტერატურა ბუენოს-აირესის გამოფენაზე
© Courtesy of Writers' House of Georgia
ბუენოს-აირესის წიგნის ბაზრობაზე მისულ დამთვალიერებელს საშუალება აქვს გაეცნოს როგორც თანამედროვე ქართული ლიტერატურის თარგმანებს, ასევე კატალოგებს ქართველი მწერლების შესახებ.
ქართული დელეგაცია ბუენოს-აირესში პანელურ დისკუსიებშიც მიიღებს მონაწილეობას, გაიმართება საქმიანი შეხვედრები კულტურის სფეროს არგენტინელ წარმომადგენლებთან და გამომცემლებთან, რაც ხელს შეუწყობს ქართული ლიტერატურის მიმართ ინტერესის გაზრდას ესპანურენოვან სამყაროში.