ჰოკეი: ქართველებმა მსოფლიო ჩემპიონატზე ზედიზედ მეოთხე გამარჯვება მოიპოვეს

თბილისი, 22 აპრილი — Sputnik. საქართველოს ყინულის ჰოკეის ეროვნულმა ნაკრებმა ესპანეთში, მსოფლიო ჩემპიონატის მეორე დივიზიონის A ჯგუფში ზედიზედ მეოთხე გამარჯვება იზეიმა.

ქართველებმა მეოთხე ტურში ავსტრალიის გუნდი ანგარიშით 3:2 დაამარცხეს (0:1, 3:0, 0:1).

ჩვენმა გუნდმა ჩემპიონატის პირველ წრეში დამაჯერებლად მოუგო ისლანდიის ძლიერ გუნდს ანგარიშით 4:1 (2:0, 1:1, 1:0), მეორე წრეში - ისრაელის ნაკრებს ანგარიშით 7:3 (1:2, 3:1, 3:0), ხოლო მესამეში - ხორვატიის ნაკრებს ანგარიშით 6:0 (1:0, 1:0, 4:0).

საქართველოს გუნდი ჯგუფში პირველ ადგილზე იმ შემთხვევაში დაიკავებს, თუ დღეს საღამოს ხორვატიის ნაკრები ესპანეთს ჩვენთვის მისაღები ანგარიშით დაამარცხებს. ამ დროისთვის ესპანეთს და საქართველოს 12-12 ქულა აქვს, ხორვატიის ნაკრებს – ცხრა.

წინა მსოფლიოს ჩემპიონატზე რეიკიავიკში მეორე დივიზიონის B ჯგუფის გუნდებს შორის, სადაც მონაწილეობდნენ ისლანდიის, ბელგიის, ბულგარეთის, საქართველოსა და მექსიკის ნაკრებები, ქართულმა გუნდმა მეორე ადგილი დაიკავა. მაშინ საქართველომ მოუგო ბელგიას, ბულგარეთსა და მექსიკას, წააგო ისლანდიასთან. პირველ ადგილზე ისლანდია გავიდა.

ქართული ჰოკეის გუნდი მსოფლიო ჩემპიონატში პირველად 2014 წელს მონაწილეობდა (მესამე დივიზიონში), სადაც ბოლო, მეექვსე ადგილი დაიკავა.