საქართველოში TEDxTbilisi 2023 კონფერენცია დაიწყო

თბილისი, 22 აპრილი — Sputnik. თბილისში, საგამოფენო ცენტრ Expo Georgia-ში შაბათს გაიხსნა კონფერენცია TEDxTbilisi, იუწყებიან ორგანიზატორები.

TED (ინგლისური სიტყვების აბრევიატურა - technology, entertainment, design, ანუ, ტექნოლოგიები, გართობა, დიზაინი) ამერიკული კერძო არაკომერციული ფონდია, რომელიც, პირველ რიგში თავისი ყოველწლიური კონფერენციებით არის ცნობილი.

მისი მიზანია უნიკალური იდეების გავრცელება. თემები ფართოა - მეცნიერება, ხელოვნება, დიზაინი, პოლიტიკა, კულტურა, ბიზნესი, გლობალური პრობლემები, ტექნოლოგიები და გართობა.

წლევანდელი TEDxTbilisi-ის მთავარი თემა გარდამტეხი მომენტებია. ამ თემის ირგვლივ სასაუბროდ და TEDxTbilisi-ის აუდიტორიისთვის საკუთარი გარდამტეხი ეტაპების გასაზიარებლად სცენაზე სხვადასხვა სფეროს მოღვაწეები შეიკრიბებიან.

TEDxTbilisi2023-ის სასაუბრო ენაა ქართული. ღონისძიების ბილეთების შეძენა შესაძლებელია ონლაინ.

სხვადასხვა წლებში TEDxTbilisi-ს სპიკერები იყვნენ მწერალი, პოეტი, ტელეწამყვანი და პარლამენტის ეროვნული ბიბლიოთეკის დირექტორი გიორგი კეკელიძე, საქართველოს ექს-პრეზიდენტის მეუღლე სანდრა რულოვსი, TBC Holding-ის ხელმძღვანელი მამუკა ხაზარაძე და სხვ.