თბილისი, 17 აპრილი — Sputnik. არ გამოვრიცხავ, რომ „ერთიანი ნაციონალური მოძრაობის“ ამომრჩევლებმა არჩევნების ლეგიტიმაცია ეჭვქვეშ დააყენონ, ვინაიდან მოქმედი თავმჯდომარის, ლევან ხაბეიშვილის დაპირებები ცრუ აღმოჩნდა, განაცხადა ენმ-ის ერთ-ერთმა ლიდერმა ბაჩო დოლიძემ.
ასე უპასუხა ნიკა მელიას გუნდის წარმომადგენელმა შეკითხვას, შეიძლება თუ არა, რომ „ნაციონალურ მოძრაობაში“ ახალი არჩევნები ვიხილოთ.
როგორც დოლიძემ აღნიშნა, ხაბეიშვილის გუნდმა არა მარტო მათ, არამედ ყველას „დაუკეტა კარი“, ვინც მათ პოზიციას არ იზიარებდა.
„მე რომ ანალოგიური კამპანია მეწარმოებინა და მეთქვა, რომ ჩემი არჩევის შემდგომ ორ დღეში მიხეილ სააკაშვილს გავათავისუფლებ <...> თუ დასჭირდა, ძალისმიერი მეთოდითაც, ნებისმიერი გაიმარჯვებდა. შესაბამისად, როდესაც ეს არ კეთდება, არ გამოვრიცხავ, რომ ჩვენი ამომრჩევლისგან დადგეს კითხვები ლეგიტიმაციასთან დაკავშირებით. იმიტომ, რომ ცრუ დაპირებებით როდესაც მოდიხარ, მერე იქმნება პრობლემები“, — განაცხადა დოლიძემ.
მანამდე „ნაციონალური მოძრაობის“ ახლად არჩეულმა თავმჯდომარე ლევან ხაბეიშვილმა ნიკა მელიასა და მის თანამოაზრეებს ურჩია, ან პატივი სცენ არჩევნების შედეგებს, ან ცალკე პარტია შექმნან.