თბილისი, 6 აპრილი — Sputnik. საქართველოში ძაღლების დაჩიპვა შეიძლება სავალდებულო გახდეს, განაცხადა საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ.
კანონპროექტზე მუშაობა, რომელმაც მიუსაფარ ცხოველებთან დაკავშირებული საკითხი უნდა დაარეგულიროს, 2022 წლის დეკემბერში დაიწყო. წინასწარი მონაცემებით, პროექტი ძირითადად ძაღლების ყოლისა და გამრავლების საკითხს შეეხება.
„კანონპროექტის მთავარი მიზანი იქნება – მკაცრად გაკონტროლდეს ძაღლების ყოლისა და გამრავლების საკითხები. სხვანაირად, სახელმწიფოს მხრიდან რაც არ უნდა საოპერაციოები შეიქმნას და კასტრაცია-სტერილიზაცია ჩატარდეს ყოველდღიურად, თუ არ გაკონტროლდნენ ადამიანები, ვინც ყიდულობს ან ამრავლებს ძაღლებს, პრობლემა პრაქტიკულად ვერ გადაიჭრება“, – განაცხადა ბითაძემ.
მისი თქმით, რიცხოვნობის გაკონტროლების ერთადერთი გზა მონიტორინგია.
„კანონპროექტის ამოქმედების შემდეგ სავალდებულო იქნება, რომ მოხდეს ყველა ძაღლის ჩიპირება“, – განაცხადა ბითაძემ.
როგორც ბითაძემ აღნიშნა, არცერთი ვეტერინარული კლინიკა, ზოომაღაზია, ბაზრობა არ იქნება უფლებამოსილი ძაღლი გაყიდოს ან გაამრავლოს ჩიპირების გარეშე. ცვლილებების შედეგად ყველა ძაღლი, რომელიც ქუჩაში მოხვდება, იდენტიფიცირებული იქნება, ხოლო მეპატრონეს, რომელმაც ის გაუშვა, შესაბამისი სანქციები დაეკისრება.
გარდა ამისა, ფულადი ჯარიმა გაიზრდება ძაღლების გასეირნების წესების დარღვევისთვისაც.