აშშ-ის სანქციები: იუსტიციის უმაღლესი საბჭოს მოსამართლეებს ღარიბაშვილთან შეხვედრა სურთ

თბილისი, 6 აპრილი – Sputnik. საქართველოს იუსტიციის უმაღლესი საბჭოს წევრმა, მოსამართლე დიმიტრი გვრიტიშვილმა მიმართა პრემიერ-მინისტრ ირაკლი ღარიბაშვილს თხოვნით, უმოკლეს ვადაში დანიშნოს შეხვედრა მოსამართლეებთან, ასე გამოეხმაურა იგი კოლეგების წინააღმდეგ აშშ-ის სახელმწიფო დეპარტამენტის მიერ სანქციების დაწესებას.

ამერიკის შეერთებულმა შტატებმა სავიზო სანქციები დაუწესა სამ მოქმედ მოსამართლეს – მიხეილ ჩინჩალაძეს, ლევან მურუსიძეს, ირაკლი შენგელიას და ყოფილ მოსამართლე ვალერიან ცერცვაძეს, ასევე მათ ოჯახებს. ბლინკენმა თავის განცხადებაში ისინი „მნიშვნელოვან კორუფციაში“ დაადანაშაულა. მისი თქმით, მათ, იყვნენ რა სასამართლოების თავმჯდომარეების და საქართველოს იუსტიციის უმაღლესი საბჭოს წევრები, ბოროტად ისარგებლეს თავიანთი უფლებამოსილებით და ამით შეარყიეს კანონის უზენაესობა და საზოგადოების ნდობა ქართული სასამართლო სისტემის მიმართ.

როგორც გვრიტიშვილმა აღნიშნა, თავდასხმები სასამართლოზე ადრეც ყოფილა, მაგრამ ახლა „ყველაზე სერიოზული“ მოხდა.

„ეს არ არის მხოლოდ კონკრეტული მოსამართლეების სანქცირება, ეს არის გზავნილი სასამართლო ხელისუფლების მიმართ, მისი დამორჩილების და მიტაცების მცდელობა“, - განაცხადა გვრიტიშვილმა.

მისი თქმით, საქართველოში სასამართლო სისტემის დამოუკიდებლობის განადგურების საფრთხე არსებობს. გვრიტიშვილი და სხვა მოსამართლეები პრემიერს მიაწვდიან ყველა „კულუარულ ზეწოლებზე“ ინფორმაციას, რაც მათ აქვთ.

ქართული ოპოზიცია, მათ შორის ყოფილი მმართველი პარტია „ერთიანი ნაციონალური მოძრაობა“ წლებია ამტკიცებს, რომ საქართველოში სასამართლო სისტემას მართავს კლანი ლევან მურუსიძის ხელმძღვანელობით და ახორციელებს მმართველი პარტია „ქართული ოცნება - დემოკრატიული საქართველოს“ პოლიტიკურ დაკვეთებს.

თავის მხრივ, „ქართული ოცნება“ ამტკიცებს, რომ სასამართლო სისტემა საქართველოში ხელისუფლების ცვლილების შემდეგ დამოუკიდებელი გახდა.