თბილისი, 5 აპრილი — Sputnik. საქართველოს პრემიერ-მინისტრი ირაკლი ღარიბაშვილი, პარალამენტის თავმჯდომარე შალვა პაპუაშვილი და თბილისის მერი კახა კალაძე ლეგენდარული კომენტატორისა და საკალათბურთო სპეციალისტის ჯამლეტ ხუხაშვილის გარდაცვალების გამო მწუხარებას გამოთქვამენ.
ჯამლეტ ხუხაშვილი 78 წლის ასაკში გარდაიცვალა. გავრცელებული ინფორმაციით, ის ბოლო წლებში ავადმყოფობდა.
პრემიერმა ჯამლეტ ხუხაშვილის ოჯახს, ახლობლებს, მეგობრებსა და მთელ საზოგადოებას სამძიმარი გამოუცხადა.
„ჯამლეტ ხუხაშვილმა, როგორც ყველასათვის საყვარელმა და ცნობილმა სპორტის კომენტატორმა, სახელი გაითქვა თავისი გამორჩეული სტილის დამსახურებით. მის სახელს უკავშირდება როგორც პირადი წვლილი ქართული სპორტის განვითარების საქმეში, ისე მისი პოპულარიზაციის ხელშეწყობა. ჯამლეტ ხუხაშვილი ასევე იყო ქართველი და ებრაელი ხალხების ურთიერთობათა განმტკიცების დიდი ქომაგი და თავისი ქვეყნის გულმხურვალე პატრიოტი", – განაცხადა ირაკლი ღარიბაშვილმა.
ხუხაშვილის ოჯახის წევრებს, ახლობლებსა და ქართული სპორტის საზოგადოებას სამძიმარი გამოუცხადა შალვა პაპუაშვილმაც. როგორც მან აღნიშნა, ჯამლეტ ხუხაშვილის დამსახურება განუზომელია ქართული სპორტის განვითარების საქმეში.
„მან აღზარდა თაობები, ვინც ჩვენი ქვეყნის ღირსებას მსოფლიოს საუკეთესო სპორტულ არენებზე დღესაც ამაყად იცავენ, მის მიერ წაყვანილი სპორტული რეპორტაჟები კი დიდხანს დარჩება ჩვენთვის გამარჯვების სიმბოლოდ", – დაწერა პაპუაშვილმა სოციალურ ქსელში.
ხუხაშვილის გარდაცვალების გამო მწუხარება გამოთქვა თბილისის მერმაც.
„ყველასთვის საყვარელი ადამიანი, ცნობილი სპორტული კომენტატორი, საპატიო თბილისელი ჯამლეტ ხუხაშვილი დააკლდა საქართველოს და თბილისს. ბატონი ჯამლეტის ცხოვრება და საქმიანობა მაგალითია, თუ როგორ უნდა გიყვარდეს საკუთარი საქმე და ქვეყანა", – განაცხადა კახა კალაძემ.
ხუხაშვილი 1963 წლიდან იყო სპორტული კომენტატორი. 1980-1992 წლებში მუშაობდა: საქართველოს ტელევიზიაში, რადიოში, ტელეკომპანია „იმედში", სპორტულ რადიო „ჯაკოში". იყო საზოგადოება „დინამოს" მწვრთნელი.
1994 წლიდან იყო საქართველოს ეროვნული საკალათბურთო ნაკრების უფროსი, 1990 წლიდან „მაქაბის" კლუბის პრეზიდენტი.
ხუხაშვილი ავტორია საიუბილეო წიგნისა „ყურადღება" (2004).
ის დასახელებულია „დინამოს" საუკეთესო მწვრთნელად (1986), საუკეთესო სპორტულ კომენტატორად (2004). იყო სპორტული რადიო „ჯაკოს" გენერალური დირექტორი. 2012 წელს მიენიჭა საპატიო თბილისელის წოდება.