თბილისი, 2 აპრილი – Sputnik. ქართველმა მომღერალმა ნუცა ბუზალაძემ მსოფლიოში ცნობილ ვოკალურ პროექტზე - American Idol-ზე მაყურებელი და ჟიურის წევრები აღაფრთოვანა.
შემსრულებელმა გადალახა შესარჩევი ტური და მეორე ეტაპზე შეასრულა სელიონ დიონის სიმღერა I Surrender. გამოსვლა იმდენად ძლიერი იყო, რომ ბოლოს ფეხზე წამოდგა მთელი დარბაზი, მათ შორის ჟიურის წევრები - ლაიონელ რიჩი, ლუკ ბრაიანი და კეტი პერი.
ლიონელ რიჩიმ სოციალურ ქსელში ნუცას პოსტიც კი მიუძღვნა: „როცა წლიდან წლამდე ვამბობთ, რომ საუკეთესო ტალანტები გვაქვს, ეს სიმართლეა!“ - დაწერა რიჩიმ და ნიჭიერი ქართველი მომღერალი მონიშნა.
ნუცას ახალი ვიდეორგოლი დღეს გამოვიდა, თუმცა მანამდე ქსელში ბუზალაძის გამოსვლის ფრაგმენტი უკვე გავრცელდა. კონკურსზე მისი შემდგომი ბედი ჯერჯერობით უცნობია, თუმცა მაყურებლისა და ჟიურის რეაქციით თუ ვიმსჯელებთ, ის წარმატებას მიაღწევს.
ნუცა ბუზალაძე თინეიჯერობის ასაკიდან წინ დიდი წარმატებით მიიწევს. ცნობილი მომღერალი პოპულარულ კონკურსებში უშიშრად გამოდის. არტისტი საქართველოს ფარგლებს გარეთ უკვე დიდი ხანია გაიცნეს. 2014 წელს მან გაიმარჯვა პოპულარული მუსიკის ახალგაზრდა შემსრულებლების საერთაშორისო კონკურსში „ახალი ტალღა“. მონაწილეობდა კონკურსებში „ცეკვავენ ვარსკვლავები“, „ერთი ერთში“, თურქულ Voice-ში და ა.შ.