თბილისი, 8 მარტი – Sputnik. ევროკავშირის უმაღლესმა წარმომადგენელმა ჟოზეპ ბორელმა განაცხადა, რომ უცხოური აგენტების შესახებ ქართული კანონპროექტი ეწინააღმდეგება ქვეყნის მიზანს, გახდეს ევროკავშირის წევრი.
ბორელის თქმით, კანონპროექტის მიღება პირველი მოსმენით – ეს ცუდი განვითარებაა საქართველოსა და მისი მოსახლეობისთვის.
„ეს კანონი შეუსაბამოა ევროკავშირის ღირებულებებთან და სტანდარტებთან. ის ეწინააღმდეგება ევროკავშირში გაწევრიანების შესახებ საქართველოს გაცხადებულ მიზანს, რომელსაც მხარს უჭერს საქართველოს მოსახლეობის დიდი უმრავლესობა. მის საბოლოოდ მიღებას, შესაძლოა, სერიოზული შედეგები ჰქონდეს ჩვენი ურთიერთობებისთვის“, – ნათქვამია ბორელის განცხადებაში.
განცხადებაში აღნიშნულია, რომ ევროკავშირი მოუწოდებს საქართველოს, დაიცვას დემოკრატიის ერთგულება, კანონის უზენაესობა, ადამიანის უფლებები. გარდა ამისა, ბორელმა საქართველოს ხელისუფლებას ადამიანების მშვიდობიანი პროტესტის უფლებები შეახსენა.
გუშინ პარლამენტის შენობასთან რამდენიმე ათასი ადამიანი შეიკრიბა, რომლებიც პირველი მოსმენით „უცხოური გავლენის გამჭვირვალობის შესახებ“ კანონპროექტის მიღებას აპროტესტებდნენ. აქცია პოლიციასთან დაპირისპირებაში გადაიზარდა. შსს-ს განცხადებით, აქციის მონაწილეებმა სპეცრაზმს „მოლოტოვის კოქტეილები“ ესროლეს. ამის საპასუხოდ პოლიციამ ცრემლმდენი გაზი და წყლის ჭავლი გამოიყენა.
შსს-ს მონაცემებით, დაკავებულია აქციის 66 მონაწილე, დაშავდა დაახლოებით 50 სამართალდამცველი.