თბილისი, 3 მარტი – Sputnik. პოლიტიკური პარტიების მიერ საუბნო საარჩევნო კომისიებში დანიშნული წევრებისთვის საარჩევნო კომისიის წევრის სერტიფიკატი შესაძლოა სავალდებულო გახდეს.
„საარჩევნო კოდექსში“ ცვლილებების პროექტი ფრაქცია „ქართულმა ოცნებამ“ მოამზადა, რომელიც პარლამენტის ბიუროს განსახილველად უახლოეს სხდომაზე წარედგინება.
აღსანიშნავია, რომ ამჟამად მოქმედი კანონი ადგენს სავალდებულო მოთხოვნათა ჩამონათვალს, რომელსაც უნდა აკმაყოფილებდეს პირი საუბნო საარჩევნო კომისიის წევრად დანიშვნისთვის.
ერთ-ერთი ასეთი კრიტერიუმი საუბნო საარჩევნო კომისიის წევრის სერტიფიკატის ფლობაა. თუმცა საარჩევნო კანონმდებლობა გამონაკლისს აწესებს, რომლის თანახმად, საუბნო საარჩევნო კომისიის წევრის სერტიფიკატი არ მოეთხოვებათ საუბნო საარჩევნო კომისიის იმ წევრებს, რომლებსაც პარტიები ნიშნავენ.
ფრაქცია „ქართული ოცნების“ თავმჯდომარის მოადგილის გივი მიქანაძის თქმით, „ეუთო/ოდირი“ (OSCE/ODIHR) და ვენეციის კომისია საკუთარ დასკვნებში საუბნო საარჩევნო კომისიის წევრებისთვის შესაბამისი სერტიფიკატის მოთხოვნას მიესალმებიან.