თბილისი, 20 თებერვალი – Sputnik. ესპანეთის დედაქალაქ მადრიდში მასშტაბური სპეცოპერაციის შედეგად ქართული კრიმინალური დაჯგუფების 25 წევრი დააკავეს, რომელთა შორის ხუთი ქალია, იუწყება ტელეკომპანია „რუსთავი2“.
გავრცელებული ინფორმაციით, ქალები ოჯახებში დამხმარეებად მუშაობდნენ.
ადგილობრივი მედიის ცნობით, საგამოძიებო მოქმედებების ფარგლებში ჩხრეკა შვიდ მისამართზე ჩატარდა. ამოღებულია მოპარული ძვირადღირებული საათები, სამკაულები, ასევე ელექტრონული მოწყობილობები. მათ შორის მობილური ტელეფონი, პლანშეტი, ლეპტოპი, ასევე მუსიკალური ინსტრუმენტები.
დაკავებულებს ბრალად ედებათ სულ მცირე 14 სახლის გაქურდვა. ესპანური მედიის ინფორმაციით, დაჯგუფებას ე.წ. კანონიერი ქურდები ხელმძღვანელობდნენ.
საგამოძიებო მოქმედებები საქართველოს ძალოვან სტრუქტურებთან თანამშრომლობით ჩატარდა.