თბილისი, 20 თებერვალი — Sputnik. პარლამენტის საპროცედურო საკითხთა და წესების კომიტეტმა მხარი დაუჭირა რეგლამენტში შესატან ცვლილებებს, რომელიც დეპუტატებს, რომლებმაც საპარლამენტო პარტია დატოვეს, პოლიტიკური ჯგუფის შექმნის უფლებას აძლევს.
პარლამენტში პოლიტიკური ჯგუფის შექმნა სულ ცოტა ორ დეპუტატს შეუძლია, მათ შეუძლიათ ისარგებლონ ისეთივე უფლებამოსილებით, როგორიც ფრაქციებს აქვთ. თუმცა, ამჟამად მოქმედი კანონი ერთზე მეტი ფრაქციის ან პოლიტიკური ჯგუფის შექმნას უკრძალავს იმ დეპუტატებს, რომლებიც ერთი პარტიის სიით გავიდნენ.
პროექტის ერთ-ერთი ინიციატორის გურამ მაჭარაშვილის განმარტებით, ცვლილება პარლამენტის პოლიტიკური სპექტრის ყველა სუბიექტს მისცემს საშუალებას მაქსიმალურად გამოიყენოს პარლამენტის რეგლამენტით გათვალისწინებული ყველა შესაძლებლობა იმისათვის, რომ საზოგადოებას მიაწოდოს სწორი ინფორმაცია.
ცვლილებების თანახმად, 2024 წლამდე პოლიტიკური ჯგუფი შეუძლიათ შექმნან დეპუტატებმა, რომლებმაც დატოვეს პარტია, თუ ამ პარტიას უკვე აქვს ფრაქცია პარლამენტში.
ცვლილებების ავტორები არიან დეპუტატები, რომლებმაც დატოვეს მმართველი პარტია „ქართული ოცნება - დემოკრატიული საქართველოს“ რიგები და დააარსეს მოძრაობა „ხალხის ძალა“.
შესწორებების მიღებისა და მისი ამოქმედების შემთხვევაში საკუთარი პოლიტიკური ჯგუფების შექმნას შეძლებენ „ხალხის ძალაც“ და ექს-პრემიერ გიორგი გახარიას პარტიის „საქართველოსთვის“ წარმომადგენლებიც, რომლებმაც „ქართული ოცნება“ დატოვეს.