თბილისი, 7 თებერვალი - Sputnik. ოპოზიცია საქართველოში ხელახლა გახდება შესაქმნელი, თუ ყველაზე დიდი ოპოზიციური პარტიის, „ერთიანი ნაციონალური მოძრაობის“ წარმომადგენლები პარლამენტს დატოვებენ, განაცხადა ოპოზიციური პარტია „გირჩის“ დეპუტატმა ვახტანგ მეგრელიშვილმა.
„ნაცმოძრაობამ“ ხელისუფლება ექს-პრეზიდენტ მიხეილ სააკაშვილის პოლიტიკურ შურისძიებაში დაადანაშაულა და პარლამენტში მუშაობაზე უარი თქვა. გუშინ თბილისის საქალაქო სასამართლომ უარი უთხრა სააკაშვილს გათავისუფლებაზე ან პატიმრობის გადავადებაზე ჯანმრთელობის მდგომარეობის გამო. „ნაცმოძრაობის“ პოლიტსაბჭოს ახალმა ხელმძღვანელმა, დეპუტატმა ლევან ბეჟაშვილმა განაცხადა, რომ სააკაშვილი წამების, არაადამიანური მოპყრობის მსხვერპლია და ადგილი აქვს მის განზრახ მკვლელობას.
„თუ ჩვენი კოლეგები პარლამენტს დატოვებენ, ცხადი გახდება მოსახლეობისთვის, რომ ოპოზიცია ახლიდან არის შესაქმნელი – ოპოზიცია ახლიდან არის გასაკეთებელი, რადგან არაფერ კავშირში არიან პოლიტიკურ პროცესთან“, - განუცხადა მეგრელიშვილმა ჟურნალისტებს.
ოპოზიციონერი კოლეგები შორს არიან რეალობისგან და, ფაქტობრივად, საკუთარი ილუზიებით შექმნილ სამყაროში ცხოვრობენ, აღნიშნა მან.
„მათ უფლება აქვთ, რაც უნდათ, ის აკეთონ, მაგრამ ეს არ ნიშნავს, რომ ამას რაიმე კავშირი აქვს ან საქართველოს დასავლურ მომავალთან, ან მიმდინარე საქმიანობასთან. თუ ჩვენ ამ ხალხს პოლიტიკოსებად მივიჩნევთ, მაშინ 12-პუნქტიანი გეგმა ვერ შესრულდება და სხვა რაღაც არის მოსაფიქრებელი იმისთვის, რომ ეს გეგმა შესრულდეს“, – განაცხადა მეგრელიშვილმა.
ევროპულმა საბჭომ 2022 წლის ივნისში მიიღო გადაწყვეტილება, აღიაროს საქართველოს ევროპული პერსპექტივა და გამოთქვა მზადყოფნა, მიანიჭოს მას კანდიდატი ქვეყნის სტატუსი, როგორც კი შესრულდება 12 პირობა, რომელთა შორისაა დეპოლარიზაცია, დეოლიგარქიზაცია, მედიაგარემოს გაუმჯობესება, სასამართლო სისტემის დამოუკიდებლობა და ა.შ.
ევროკავშირი საქართველოს მიერ 12 პირობის შესრულებას 2023 წლის გაზაფხულზე შეაფასებს, ხოლო ევროკომისიის ოფიციალური დასკვნა შემოდგომაზე იქნება მზად.