თბილისი, 1 თებერვალი – Sputnik. მძიმე თანდაყოლილი დაავადებით – აქონდროპლაზიით დაავადებული ბავშვების მშობლებმა ჯანდაცვის სამინისტროს შენობასთან საპროტესტო აქცია გამართეს.
აქონდროპლაზია არის თანდაყოლილი დაავადება, რომლის დროსაც ირღვევა ჩონჩხის და თავის ქალის ფუძის ძვლების ზრდის პროცესი. პათოლოგიის განვითარების მიზეზია გენეტიკური მუტაცია. ზოგიერთი ნაყოფი მუცლად ყოფნის პერიოდშივე იღუპება. დარღვევები შესამჩნევია სიცოცხლის პირველივე დღეებიდან: თავი გადიდებულია, კიდურები დამოკლებულია.
აქციის მონაწილეები ჯანდაცვის სამინისტროსგან ითხოვენ უახლესი მედიკამენტის დაფინანსებას, რომელიც, მათი თქმით, ერთადერთი პრეპარატია მსოფლიოში ზრდის პრობლემების მქონე ბავშვებისთვის.
„ეს არის იშვიათი დაავადება, აქონდროპლაზია, რომელიც ვითარდება 25 ათასიდან ერთ ბავშვს... ჩვენი საქართველო არ არის დიდი ქვეყანა, არ ვართ ბევრნი, ეს მედიკამენტი არის „ვოზორიტიდი“, რომელიც აქამდე არ არსებობდა. მან FDA-ს (ამერიკის შეერთებული შტატების საკვების და წამლის მარეგულირებელი ფედერალური სააგენტო) ლიცენზია მოიპოვა ერთი წლის წინ, ასევე აღიარა ევროპის ყველა ქვეყანამ, ამიტომ ჩვენი ბავშვებისთვის ეს არის ერთადერთი გამოსავალი“, – განაცხადა ერთ-ერთმა მშობელმა ქეთევან ბეგიაშვილმა ტელეკომპანია „რუსთავი2“-ის ეთერში.
მშობლები 2 თებერვალს აპირებენ შეხვდნენ ჯანდაცვის მინისტრის მოადგილეს თამარ გაბუნიას. მათი თქმით, თუ შეხვედრა უშედეგოდ დასრულდება, ისინი უკიდურეს ზომებს მიმართავენ.
მშობლებს ეკავათ პლაკატები წარწერებით: „ვითხოვთ მკურნალობას ჩვენი შვილებისთვის“, „ნუ წაართმევთ ჩვენს შვილებს ჯანმრთელობის უფლებას“, „ვითხოვთ ჯანდაცვის მინისტრთან შეხვედრას“.